India sorkari elections magitsüla: NNPGs

Dimapur, Aenjeti (January) 13 (TYO): NNPGs indang Working Committee (WG)-i India sorkar dang assembly elections magitsü atema mepishia metetdaktsü.
Mapang talangka mebenteti aruba Indo-Naga yimten tebilemtsü bentettsü atema nübortemi akhanger aser ibaji atalokdaktsünür. Anungji India sorkari nübortem ola angaa, olemtepba nung tetsükdaktsü majurutsü atema assembly election magitsü mepishir, ta Media Cell, Working Committee, NNPGs sangdong ka nung metetdaktsü.
“India sorkar den yimten olemtep katettsüsa mapang moatsüba atema Tsüngrem nem tenüngsang agütsür. Maneni Naga public, Naga medemertem aser temeimertemi onok pusema nungitba atema kangasa pelar. Committee-i olemtepa aruba nung tongtipang mapang ka nung ajemoka aidang, nisung ajaki onok atema sarasademjang ta mepishir” ta sangdong nungsa shia lir.
Nagaland Legislative Assembly elections agitsü atema maparen inyaker aser kasa mapang nung yimten olemtep agir. Iba ama tensa ka nung election agiba ajanga tetsükdaktsü ajurutsü.
Nagaland Legislative Assembly-i tawa India sorkar dang Nagaland nung elections thinena atatsü lemtetbaji kanga junger. India sorkari elections anena atar küm 70 tashi mebenteti aruba tebilemtsü atema tatembang telemtetba ka agitsüla, ta parnokisa ashi.
Nagaland nung candidate ajaki nübortem tenangzükba sülen anidaktsü ayongzüker. Election Commission of India (ECI)-i elections agitsüsa ta asü nungbo, nübortemi tim telemtetba ka agitsü. Onoki lennir ajak dang Naga yimten latettsü atema rangloker mapa inyakdaktsünür. Asenok telemtetba ka agitsü mapang ka nung lir, anungji lennirtemi shisadanga nübortem den adentsüla, ta Media Cell sangdong nungsa ashi.