India sorkari Naga yimten telok ajak den angatetteptsüla: TR Zeliang

Dimapur, August 26 (Agencies): Mapang talangka melemtetteti aruba Naga yimtem tebilemtsü atema tatembang telemtetba ka agitsü. Ajisüaka, iba nung ajaki shilem agitsüla aser India sorkari tang dang nungi talila inyaktsüla, ta Nagaland Chief Minister, TR Zeliang-i ashi.
TR Zeliang-i Delhi nung Naga peace talks atema Interlocutor RV Ravi den tawa olemtepba indang ashiba agi, “ni Ravi dang tanga Naga National Political Groups (NNPGs) lennirtem den ajuruteptsü aser parnok dang telemtetba ka agitsü atema inyakba maparen angatetdaktsütsü merangtsüla ta ashi.”
“Kasa mapang nung Naga yimten tebilemtsü atema tatembang telemtetba ka agiba nung tanga NNPGs adentsüla ta pai NSCN (IM) lennir Muivah nem angatetdaktsütsüla” ta TR Zeliang-isa Ravi dang ashiba osang metetdaktsü.
Muivah-i tanga NNPGs dendaktsütsü mulunga agizüktsüla aser külen tanga NNPGs-ia tatembang telemtetba ka agitsü atema mapa inyakba nung timtem magütsütsü atema Interlocutor-i parnok jen jembitsüla. Paisa tanga NNPGs lennirtem den ajurutepa jembitsüla aser Naga yimten tebilemtsü latettsü atema inyakba mapa nung tetsükdaktsü majurudaktsütsü atema pai parnok nem angatetdaktsütsüla, ta TR Zeliang-isa Ravi dang ashiba osang metetdaktsü.
“Ni Ravi dang item teinyaktsütemji meinyak lir ta ashi. Ravi-i India sorkar tenüng nung mapa inyaker aser Prime Minister-i pa dak temulung lemteta iba mapa nungloktsü. Saka meinyaki aliba mapatem meinyakra aser NSCN (IM) o tanga NNPGs tsüngda tangatettep kati marudaktsüra, ajaki adenba telemtetbaji magitettsü” ta TR Zeliang-isa ashi.
“Interlocutor Ravi-i item onük süoki ia agizük aser külen Muivah-ia iba tangatetba mulunga agizükogo. GPRN/NSCN lenniria iba tebilemba agizük aser Ravi-i GPRN/NSCN jaokra, onok renema lir ta ashi. Kasa tebilembaji NSCN (R) tanishir nem-a sangoktsüogo” ta paisa ashi.
“India sorkari tanga NNPGs ajak den olemtep tenzüktsüla, kechiyong parnok ajaki Naga yimten tebilemtsü atema tatembang telemtetba ka agitsü atema dang rarayonga arur” ta CM-isa osangbener dang ashi.
Tesüiba küm 20 tashi olemtepyonga arudang, Ravi-i Naga nunger maitsü balaka ta asüba angatetogo aser ibaji tajangzük rongnung ka lir. Ano, Muivah aser tanga telok ajaki India sorkar telemtetba agitsü atema teyari agütsütettsü ta angateta arubajia tajangzük tulu ka lir. Anungji, ajaki khurettem angateta arubaji tamaitsü tajung ka lir ama ni bilemer, ta paisa ashi.
“Ni Chief minister menden nung liang mesüra teli, ni Naga yimten tebilemtsü latettsü atema maneni inyaktsü. Naga yimten telemtetba agiba ajanga Northeast ajunga nung yimjung tensa arutsü imlar” ta TR Zeliang-isa shisem.