India sorkari Nepal ambassador jaokogo

New Delhi, September 22 (Agencies): India kidanger Nepal nung Linük Temzüng tasenba agizükba ajanga tesüiba hopta ishika tsüngda arrtsülen rara adoka nisung 40 asüba sülen India sorkari rongtak nüngdak jembitsü atema Nepal nung India ketdangser jaok, ta Mongolbar nü ketdangsertemi ashi.
Nepal southeren plains nungi minority nüburtemi sashia lungkak aitaka Deobar nü Nepal nung Linük temzüng tasenba agizükogo.
Nepal nung India ambassador, Ranjit Rae Hombar nü New Delhi tonga aruogo aser pai anogo ka piyong New Delhi aser Kathmandu nungi Indian foreign ministry ketdangsertem den jembitsü.
Sangdong ka ajanga India foreign ministry-i south tsütsülen rara adokba atema Nepal aitsüogo. Hombar nü iba tesem nung police-i lungkak aiter nisung asem dak injang agi akah.
“Item tesem nung tensa azüoktsü atema onoki Nepal yimtenren lenirtem nem nenshia metetdaktsüogo,” ta Hombar aonung tesü foreign ministry-i sangdong ka ajanga ashi.
“Iba ya mapang tetemsü nung inyak asünungbo tensa iba tashi ya makümtsü liasü,” ta ministry-isa ashi.
Taküm Nepal nung menoknok lendong tulu ana ataloka nisung 9000 dak tema asüba mapang India-i tekaraba nung Nepal yariba sülen tang item olen ajanga linük ana tsüngda tesentaktep tera mejungi akümba temaitsü sayur.
Nepal southern plains ajanga freight company aser osettsüset belenertemia iba tesem nung security majungba osang metetdaktsüogo, ta kasa sangdong ajanga ashi.
India aser Nepal na arrtsü ya telatak lir aser mapang talangka nungi rongsenkettsüng aser sobaliba nung tesentaktep lir. Ajisüaka Nepal-i aiben, India-i par linük maparen nung teka amouker ta aija arur.
Nepal nunger temzüng tasenba federal inyakyim ajanga state tenet akümer, saka Nepal ya Hindu linük ta sangdongdaktsüner teloktemi ibaji anemer.