India sorkari NNPGs jaokba atema pelar: CNTC

Dimapur, September 26 (TYO): India sorkari NNPGs indang Working Group jaokba ajanga India-i Naga yimten tebilemtsü atema süoki ia bilemer aser yimjung olemtep nung ajaki agizüktettsüsa telemtetba ka agitsü mulunger ta asüba sayur, ta Central Nagaland Tribes Council (CNTC)-i ashi.
Indo-Naga olemtep atema Interlocutor, R.N. Ravi-i Nagaland Tribes Council (NTC), Nagaland GB Federation (NGBF) aser tribal hoho balalai yimten telok ajak dendaktsütsü atema mepishiba tashi angaa inyakba atema CNTC-isa pa nem tenüngsang agütsü.
Prime Minister Narendra Modi lenisüba kübok India sorkari mapang talangka mebentetteti aruba onük angatetteptsü atema temulung kanga agüja mapa inyaker aser parnoki alizüng ka aser taginüba ka atema shinga senzüka metoktsütsü ta angatetogo, ta Media Cell, CNTC sangdong nungsa metetdaktsü.
NBCC-i tanen makai sarasadema aruba ajanga iba jenjang tongtetogo aser iba asoshi NBCC nem tenüngsang agütsür. Maneni, iba inyakyim ajanga Naga nungertem mapang tasen ka nung ayaoktsü aser asenok taginüba tongtettsü imlar, ta CNTC-isa ashi.