India sorkari Tuli Paper Mill atema sen agütsütsü nangzük

Dimapur, May 31 (TYO) : Mongulbarnü India sorkari Hindustan Paper Corporation nem sen crore 30 agütsütsü nangzükogo aser iba nungjagi Nagaland Pulp & Paper Company Limited (NPPC Ltd) nem sen crore 12 lemzüktsütsü, ta Media Cell, Chief Minister’s Office, Nagaland-i sangdong ka nung metetdaktsü.
NPCC nem sen crore 12 lemzüktsüba ajanga sentsüh odoktsü aser osettem yanglushitsü atema bener aobatem meyipa bener arutettsü, ta sangdong nungsa shia lir.
Mongulbar nikongtsütsü Nagaland Chief Minister, T.R Zeliang-i Tuli Paper Mill dak sendakba onük jembitsü atema pa indang residential office nung senden ka jazüka amen.
Iba senden nung Industries & Commerce Parliamentary Secretary, Amenba Yaden, Chief Secretary, Industries Department nungi ketdangsertem, Joint Secretary, Department of Heavy Industries, Government of India Rajesh Kumar Singh, Hindustan Paper Corporation CMD Shashi Kanth Jain, aser tanga ketdangsertem aika aden.
Senden nung Chief Minister-i NPPC Ltd indang khurettem lemsatep aser iba dak sendaka alirtem ajaki Paper Mill tanaben lapoktsü atema khurettem kokteta inyaktsü ayongzük, ta  CMO indang sangdong nungsa shia lir.
2013 nung Ministry of Heavy Industries-i sen crore 100 lemzüktsüba nungi, sen crore 60 ji HPC Ltd dangi belen. Anungji ketdangsertemi iba inyakyim jungjunga bushitsüla aser aibelena inyakbatem lira, tekaratiba nung metongshitsüla, ta Chief Minister-isa metetdaktsü.
Tuli Area Joint Council Forum-i Paper Mill tanaben lapoktsüba indang onük dak sendakba nung tezüluba nung takhangba kar agüja lir, anungji memenui itemji mapa küma inyaktsüla. Paper Mill lapoktsü atema ali tenlartem indang taginübatemji akhümtsübutsüla aser parnok tezü metangdaktsüi mapa inyaktsüla, ta T.R Zeliang-isa senden nung adenertem dang ashi.
Chief Minister-isa tang aliba Board of Directors nung State sorkar ketdangsertem enoksemtsü aser District nung Deputy Commissioner Board nung dendaktsütsü atema nenshia metetdaktsü.
Tang ya Board of Directors nung Director-ji Secretary, Industries & Commerce dang lir. Tuli Paper Mill atema fulltime Managing Director ka alitsüla, ta T.R Zeliang-isa shisem.
Senden nung Joint Secretary aser CMD nati Paper Mill dak sendakba onüktem atema inyaktsü aser tekaratiba nung Mill tanaben lapoktettsüsa mapa inyaktsü ta Chief Minister dang nangzük.
2017 küm Paper Mill asoshi sen crore 552 revival package ama agütsütsü metetdaktsü, saka iba nungjagi sen crore 54.62 dang agütsü. Ano, June 2013 nunga sen crore 679 indang revival package ka agütsütsü metetdaktsü, ajisüaka iba nungjagi sen crore 100 dang lemzükja liasü. Saka taoba CMD HPC Ltd-i sen crore 100 nungi sen crore 60 NPC Ltd. indang mapa tanga kar inyaktsü atema belen aser iba inyakyimji Nagaland Chief Minister-i kanga süoki ia agir, ta Media Cell sangdong nungsa metetdaktsü.
Tanü amenba senden nung Nagaland Chief Secretary, Pankaj Kumar-ia Joint Secretary dang iba onük ya kanga süoki ia agizüka inyaktsü ayongzük.