India tasen ka yangertsü atema onok longjemer: Mamata

Kolkata, January 19 (Agencies): Tanü Kolkata nung opposition party tem senden tuluka nung jembidang Trinamool Congress tongti aser West Bengal chief minister, Mamata Banerjee-i, Narendra Modi’er sorkar mapang tembangogo, aser linük atema anepdang tasen ka arudar, ta ashi.
Iba sentong nung Biju Janata Dal aser Left parties dak alaka opposition party ajak aden.
“Mozü expire asüba ama Modi’er expiry anogo tembangogo. Linük atema anepdang tasen ka arudar. “Asenoki ibaji tesülen metettsü. Tang mapang ya Narendra Modi aser BJP na tamakok ngudaktsütsü mapang lir,” ta lai ashi. Banerjee-i, BJP-i küm aika linük dang nungi auyaba sülen tang parnok jenjang tamajung ka nung lir, aser parnoki kechi nangzükdir nangzükaka parnok indang “tajung anogotemji” meyipa marutsü,” ta lai ashi.
Banerjee-isa, “West Bengal nung BJP menden ana lir. Iba nungjia kobi melii parnoki tamakok angutsü. Ozü teloktepi taruba election nung kechi inyakdir repranga ata liang. Ni Hardik aser Jinesh na dang tejakleni aotsü mepishir. BJP atema joko tajung anogotem malitsü. Ato kilonserji shiba kümdir kümaka ni iba atemaji mebilemer, saka ni BJP dang atsüngdokner,” ta ashi.
“Putiotsü nung ajemdaker iba senden ya ayongzüktsüsa akum. Nenoki Opposition nungi lenirji shiba, ta asüngdanger. Sabang nung nisung aika lir. Nenoki mangur no? ner party ama masü, saka onokbo lenir aika lir. Onoki akhümtsübua aliba CBI tenüng-a parnoki raksatsüogo. Ketdangsertem majung masü,” ta laisa ashi.
“Ato kilonseri ajak anema inyak. Anungji onoki kechiba pa anema mapusotsü? Pai pa merüka lir ta ashir, ajisüaka par sorkar nung ochimashi ken otem reprangdangang. Mapang melenshir, tsüngsang mopunga melenshir, anungji kechiba sorkar memelentsü,” ta lai ashi.
Lok Sabha election agitsü mapang ana nung lia BJP anema opposition party tem lokteptsü atema iba senden ya TMC-i ayongzükba liasü.
Iba senden nung yimtenren lenir 20 dak tema aden, aser parnok rongnung taoba mapang Ato kilonser, HD Deve Gowda, Karnataka Chief Minister HD Kumaraswamy, Andhra Pradesh Chief Minister N Chandrababu Naidu, Sharad Pawar, Farooq Abdullah, Sharad Yadav, Akhilesh Yadav, Tejashwi Yadav, Hemant Soren aser taoba mapang Arunachal Pradesh chief minister Gegong Apang nungeria shilem agia liasü.