India tasenba nung VIP masü saka EPI sobaliba alitsü: PM Modi

New Delhi, April 30 (Agencies): Tanü Ato kilonser, Narendra Modi-i, India tasenba nung VIP (Very Important Person) masü saka “EPI” (Every Person is Important) sobaliba alitsü, aser ‘digital India’ den külemi iba atemaji inyaka arudar, ta metetdaktsü.
Ita shia radio ajanga linük nüburtem den jembiba sentong, Mann ki Baat nung jembidang Ato kilonser Narendra Modi-i, “VIP sobaliba ajanga India linük nem takoksa agüja aruogo. Ni ajangshiba aser angatetba agi, light teremji garitem nung inoker, ajisüaka ibaji nisungtem koloki idaktsü aser ibaji ajanga VIP sobaliba ya tenteta liasü. Tangbo nisungtem melungjang nungi beacon light temeremji agientsüla. Tang nungibo VIP sobaliba masü saka EPI- India nunger nütsüng crore 125 pronglaji tongtibang asütsü. Asenok ajak longjemra mangdang/nükjidong ajak ataloktsü atema asenok dak tashi alitsü,” ta metetdaktsü.
Centre sorkari tongtibang nisungtem indang garitem nungi red beacon nokdangba atema linük senso tetsür kati kü dang pelaba metetdaktsüogo, ta Modi-isa ashi.
“Swachh Bharat ajanga gari lenmangtem nung VIP-a merüktetogo. Tangbo lenmang ajunga nung India nunger ajakji VIP lir ta lai kü dang ashi,” ta Modi-isa shisem.
Modi-i lanurtem danga taruba mei sodi mapang nung tesem tasen semdangtsü aser teka mapa balala angazüktsü ajungshiba den külemi digital currency amshitsü ajungshi.
“Tang lanurtem aikati digital currency amshidar, saka ano angazüktsü akok. Sen aazüktsü atema sorkari nenok nem maongka tulu agütsüogo. BHIM app amshiang aser iba osangji tangar nema metetdakjang aser sen aazükang,” ta paisa ashi.