India tebilemtsü onüktem atema lanurtemi lenmang bushitsüla: Tir

New Delhi, March 21 (Agencies): Tir, Pranab Mukherjee-i, India’er lenla ajaklen terenlok nükjidong ataloktsü atema linük nung loktiliba aser rongsenkettsüng tebilemtsütem atema lanurtemi lenmang bushitsü nüngdaka lir, ta metetdaktsü.

Yashi Rashtrapati Bhavan nung hopta ka piyong ‘Festival of Innovation’ sentong tatembangbuba nung kaketshirtem den jembidang Tir Pranab Mukherjee-i, loktiliba nüngdaktem atema India-i technology tsütsü purapiteta inyaktsüla, ta jembiba osang ketdangser otongdar kati ashi.

Tir-i, “India-i technology tsütsü jenjang ka tongteter alitsüa akok aser sensotem, talisa lanurtem scientific tsütsü terenlok kar alitsü akok, ajisüaka parnok dak nükjidong, nendaka inyakba aser tangar angatetba shisatsü melira asen Temzüng nung aliba mangdangji mataloktsü,” ta ashi.

“Lokti tebilemtsütem atema asenok dak sangra-a purapitetba shisatsü lira ibaji ajanga lokti ajangzüktsü,” ta pai ashi.

Tir Pranab-i ashiba agi, item ama sentong ayongzüka akaba ajanga sempet alir lanurtem tali ajungmesotsü aser parnoki lokti nem teyari agütsütsü.