India tebur Hockey team jenjang 6buba aser tetsür 10buba nung küm tembanger

New Delhi, December 12 (Agencies): India nunger tebur aser tetsür hockey team International Hockey Federation (FIH)-i tawa ranking sayaba nung jenjang trok aser ter buba nung lir.
India nunger tebur team küm tetenzüki jenjang trokbuba nung aliba memelenshi kasa jenjang nung dang küm tembanger.
Tawa tembangba Men’s Hockey World League (HWL) nung India team jenjang asembuba nung tembangba ajanga jenjang pongububa nung aliba team Germany pur den kanga anasatepa atu saka parnoki German team ya majatettet.
India nungeri point 1566 angu aser kasa mapang nung Germany nungeri point 1680 angu. Tawa sayaba ranking nung Australian tebur team-i Argentina team ajateta temaba jenjang nung lir. Parnoki HWL nung 2-1 agi Argentina team koka liasü. Iba sülen Belgium aser Netherlands na memelenshi tasembuba aser pezübuba jenjang nung lir.
Kasa mapang nung India tetsür team shirnok taküm küm tetenzüki jenjang 12buba nung liasü parnok jenjang ana tejakleni tua jenjang 10buba nung küm tembanger. Parnoki taoba ita Asian Cup akokba ajanga Spain aser Japan ajateta jenjang 10buba tongtetogo.
Tetsür team rongnung Netherlands mezüngbuba jenjang nung lir aser tanabuba aser tasembuba jenjang nung England aser Argentina na lir.