India telok Asia Cup T20 asayamong final-i iogo

Mirpur, March 01 (Agencies): India teloki wicket 5 agi Sri Lanka madak takok ngua tang tasayadak Asia Cup Twenty20 (T20) cricket asayamong final asayatsü jenjang tanü, Mongolbar nü ajangzükogo.
Tan takok anguba ajanga India teloki ajak agi points 6 ajangzüka par telok densemba group nung temaba jenjang ngua lir aser par teloki United Arab Emirates den asayaba tatembangba group asaya nung tamakok angu yongya par teloki final asayatsü jenjang angutsü.
Virat Kohli-i ball 47 nung runs 56 yanglua kanga junga asayaba ajanga par teloki tanü takok ngua tan asayamong nung asaya tasembuba atonga akoker telok aküm.
Tan final asaya nung takok ngura, India teloki tan agi continental championship takok marok 6 buba atonga agizüker telok akümtsü.
Tanü asaya nung Chamara Kapugedera-i runs 30 agiba densema, par Sri Lanka teloki overs 20 nung wicket 9 laoa ajak agi runs 138 yanglua liasü.
Ajisüaka, Kohli den külemi, Yuvraj Singh-i ball 18 nung runs 35 tashi yanglua kanga junga asayaba yong par India teloki overs 19.2 nung wicket 5 laoa ajak agi runs 142 yanglua Sri Lanka teloki yangluba runs ajangteta tanü asayaji kokadok.
Tanü asaya nung Hardik Pandya-i overs 4 nung wicket 2 agia runs 27 agütsüba den külemi, Jasprit Bumrah-ia runs 26 agüja wicket 2 agia India asoshi kanga junga shilem agi.