India telok Sultan Azlan Shah Cup final-i iogo

Ipoh, April 15 (Agencies): India teloki goal 6-1 agi Malaysia telok madak takok ngua tang tasayadak Sultan Azlan Shah Cup hockey asayamong final asayatsü jenjang tanü, Hokolbar nü ajangzükogo.
Taoba mapang takok marok 5 ben tashi agizüker, India teloki tan agi Sultan Cup asayamong final nung 7 ben buba atema shilem agitsü jenjang angur lir.
Final nung shilem agitsü asoshi tatembangba round-robin league asaya akoktsü asoshi India-i nungdaka liasü aser par teloki tanü takok anguba yong par teloki defending champion, New Zealand den temaba jenjang ngua tan final nung shilem agitsü jenjang angu.
India teloki tesüsa South Korea telok den Sultan Cup final 2010 küm asaya saka tzünglu kanga sashia aruba yong final asaya masayateti küma, par telok anati takokba lemsatepa agi.
Tanü asaya tenzüker minute 25 aser 39 buba na nung Ramandeep Singh-i par India telok asoshi goal 2 agütsüba den külemi, külem asayar, S V Sunil, Harjeet Singh, Danish Mujtaba aser Talwinder Singh nungeri minute 2, 7, 37 aser 50 buba nung goal kaka agütsüba yong par teloki goal 6-1 agi takok ngua liasü.
Shahril Saabath-ia asaya tenzüker minute 46 buba nung goal 1 agütsüba yong par Malaysia teloka tanü asaya tazüngla nung metembangtsüsa jenjang angu.
India teloki world champions, Australia telok den final nung ajuruteptsü.
Australia telokia tanü goal 3-0 agi Canada telok madak takok ngua, tan asayamong league asaya ajunga akoker telok akümba osang jangjaogo.
Australia teloki tanü tashi nung iba asayamong indang takok marok 8 ben tashi agizüka lir.
Tan asayamong tenzüker tanü tashi nung Australia teloki ajak agi points 18, India-i points 12 aser New Zealand teloki points 11 ngua temaba jenjang 3 angur telok kümogo.
Ano külen, Malaysia telokia N Zealand telok den bronze medal asoshi toktepa asayatsü renema lir.