India tenüng nung shilem agiba atema nüma atanger : Deepika

Mumbai nung Hollywood actor Vin Diesel den actress Deepika Padukone nati osangbener senden ka nung o jembidang agiba noksa angur. 

Mumbai, January 13 (Agencies) : India tsür Deepika Padukone-i tang Hollywood nung mezüng atema “XxX: Return of Xander Cage” nung shilem agir aser lai kanga nüma tanga bilemer ta ashi.
“Iba film nung shilem agibaji alima sabang nung linük asoshi agir ka ama lir aser ni tanü-asüng tetsür ka ama shilem agir” ta Deepika-i ashi.
“Alima sabang nung ni India tenüng nung shilem agiba atema kanga nüma tanga bilemer. Nenoki asüng (Hokolbar) iba film angudang tetsürtem indang yimya balala angutsü” ta lai osangbener senden ka nung ashi.
“XxX: Return of Xander Cage” film nung Deepika-i Serena Unger ta ser tetsür ka indang shilem agir aser lai Vin Diesel den nüknürateper ka ama adoker.
Sanjay Leela Bhansali-i direct asüba film- “Bajirao Mastani” ajanga takok tulu anguba sülen Deepika atema iba film ya kanga tongtipang lir. Laisa tang Ranveer Singh aser Shahid Kapoor na den ‘Padmavati’ film nung shilem tagdak lir.
“XxX: Return of Xander Cage” film ya asüng, January 14, 2017 nü India nung sayatsü aser January 20, 2017 nü US nung sayatsü sentong lir.