India tesem ajaklen minority tem kümzüktsüla: NJCF

Kohima, Tsüklai 21 (TYO): Tamangba yimsü aser sobaliba balala nung ajemdaker nübur aser tesem telemsa balala aliba linük ka nung linüki secular akhümtsübutsüla, aser tamangba yimsü aser sobaliba balala tsüngda akhümtsübutep alitsüla, ta Nagaland Joint Christian Forum (NJCF) vice-president, Rev. Dr. N. Paphino-i sangdong ka ajanga metetdaktsü.
“Nagaland nung election nüboyim sentong nung Union Minister of State for Home, Kiren Rijiju-i Khristan timba aliba state ka (Nagaland) nung parnok tamangba yimsü aser sobaliba kümzüka ayutsü atema nangzükbaji junger, ajisüaka pai sangdongbaji linük rangben atema masü saka Khristan timba aliba Khristantem dang ang nangzükbaji tia maka. Khristan reshikangshirtem, Tenla ki raksatsürtem aser Laishiba rongdoktsürtemji BJP masü, saka RSS aser VHP teloktem lir,” ta kasa sangdong nung shia lir.
“India nung nütsüng ajema aliba tamangba yimsütem anema inyaker, ajisüaka Rijiju-i taoba mapangtem, tawa aser tang-a Khristantem anema inyakba indang mejembibaji tesasatsüka lir. Nagaland nung Arogotemi RSS forces asen lima nung memelatsü; pai, ‘onok yimsüsüba mapang nung state nung Arogo aser Khristantem reshikangshira ni yimtenren nungi anentsü’ ta jembiogo. Iba ama tasütait oji linük rangben atema jembi ka asübo koda jungla ta onoki bilemer, kechiyong linük nung minority tem reshikangshi tia nung lir,” ta NJCF-isa metetdaktsü.
“NJCF-i iba ya asüngdangner: India south tsütsü Tenla kitem raksatsüba aser tamangertem jepdaktsüba tatalokbatemji Rijiju-i mangur asü? Nai jembiba o anema onoki menokdaktsü, ajisüaka nai iba ama tasütait o ya linük tesem ajaklen minority tem atema jembi nungbo onoki pelatsü aser na tali akhümtsübutsü,” ta parnokisa kasa sangdong ajanga metetdaktsü.