India tetsür Hockey Team-i otsü tasen yanglu; Olympic Semi-final-i iogo

Tokyo Olympics tetsür hockey asaya quarter final asaya nung Australia team akokba sülen India tetsür team tangokba noksa nung angur.

Luroi/August 2, 2021 (Agencies): India tetsür hockey team-i Hombarnü otsü tasen ka yangluogo, parnoki Australia team 1-0 agi koka Olympics nung mezüngbuba semifinal tongtetogo. Quarter-final nung Australia den asayaba mapang second quarter nung Gurjit Kaur-i penalty corner ka ajanga goal ka idaktsüba sülen parnoki takok angu.

India tetsür team-i Olympics nung tang mezüngbuba knockout stages tongteta otsü tasen ka yangluogo.

Iba asaya India-i akoktsü imlaa maliasü, kechiyong world no.2 Australia team ya asayamung nung khen danga tamakok mongui asayaa liasü.

Ajisüaka India team-i temulungtetba tulu nung kanga tasü ita asaya aser tera agi Australia madak takok angu. Drag-flicker Gurjit Kaur-i asaya tenzüker minute 22buba nung India atema penalty corner ka ajanga goal ka ya idakja liasü. Asaya tepeyong nung India team-i penalty corner ka dang nguteta liasü.

Tang tashi nung India tetsür team-i 1980 küm Moscow nung Olympics asayaba mapang tajungtiba asayaa lir. Iba asayamung nung team trok rongnungi parnok jenjang pezübuba nung tembanga liasü. Iba küm mezüngbuba Olympics nung tetsür hockey asayaa liasü aser round-robin format nung asayar, temaba jenjang nung tembangba team ana final asaya.

Rani Rampal-i aniba team ya Semifinal nung Argentina den asayatsü.

India team Pool A nung asaya ana akokba den asem makokba sülen jenjang pezübuba nung tembang. Kasa mapang nung Australia team-i Pool B nung asaya ajak koka temaba jenjang nung tembang. Parnok alima nung team tem rongnung Netherlands sülen tang tanabuba jenjang nung lir.

India hockey tebur team-a küm 41 sülen tang mezüngbuba semifinal tongtetogo. Parnoki Deobarnü quarter final asaya nung Great Britain goal 3-1 agi koka liasü. India asoshi Forward Dilpreet Singh, Gurjant Singh aser Hardik Singh nungeri goal kaka idaktsü aser Britain asoshi Sam Ward-i goal ka idaktsü.

Semifinal nung Belgium kokra 1980 küm Moscow Olympics sülen India tebur team tang mezüngbuba Final asayatsü. Iba asyamung nung parnoki final nung Spain koka gold medal angu, koba tibuba aser tatembangbuba liasü.