India Tir Ram Nath Kovind-i Hornbill Festival tenzüktsütsü

Kohima, November 14 (TYO): India President Ram Nath Kovind-i December 1 nü ‘International Hornbill Festival’ lapokba sentong nung adentsü.
Tanü Bamboo Hall, Kisama nung Chief Minister TR Zeliang-i bangdak department den senden ka amendang iba osang metetdaktsü.
November 30 nü President Kovind Kohima-i arutsü aser tasüngji sentong tembangba sülen New Delhi-i meyipa aotsü, ta chief minister-isa ashi.
Maneni, December 2 nü Union Defence Minister Nirmala Sitharaman-ia Hornbill festival nung shilem agitsü atema arutsü, ta paisa shisem.
Tanü TR Zeliang-i bangdak department ajak den coordination meeting liasü aser senden tembangba sülen pa den külemi sorkar ketdangsertem aser sendaktepa alirtemi Kisama heritage village sema senzü.
Senden nung Music Task Force (MTF) Director, Gugs Chishi-i, sorkar dang Dimapur nung aliba Agri Expo Site nung Hornbill International Music Festival (HIMF) aser Hornbill International Rock Contest belena amungtsü atema asüngdang.
Ajisüaka, sorkar iba asoshi temelaba ano magütsü lir.
MTF Director-isa ashiba agi, Dimapur nung kenten benjung amungtsü belenbaji security dak sendakba nung masü saka district ajaki shilem agidaktsütsü nükjidong nung lir.
Chief Minister-isa department tem aser sendaktepa alir ajak dang Hornbill festival tiptema mungtettsü atema mapa inyaktsü ayongzük.
Paisa National Highways & Infrastructure Development Corporation Ltd. (NHIDCL) aser BRO dang Kohima len National Highway-2 aser Kisama tashi NH-29 nung lenmang mejungi alibatem yanglutsü atema tetuyuba agütsü.
TR Zeliang-isa PWD dang Kohima jila aser temeket nung aliba gari lenmangtem anepalutsü atema tetuyuba agütsü.
Linük nung tongti ketdangsertem kari Kohima semdangtsü lir anungji paramilitary forces aser state police department temi benjung mapang security dak sendakba mapa jungjunga inyaktsü tuyur, ta chief minister-isa metetdaktsü.
Tang tashi nung VIP pezü- India President Ram Nath Kovind; Union Defence Minister Nirmala Sitharaman; Supreme Court Judge Justice Ranjan Gogoi aser Union Minister for Textiles, Information & Broadcasting Smriti Irani nungertemi taküm Hornbill benjung nung adentsü mulunga agizükogo.
Parnok dak alia Hornbill Festival nung adentsü atema tsünglanglen agüja aliba VIP tem adentsü atema jaokogo saka parnoki nungi ano telangzüba mangu lir.
Union Home Minister Rajnath Singh,
Union Minister for MoRTH Nitin Gatkari,
Minister of State for DoNER Dr. Jitendra Singh,
Arunachal Pradesh Chief Minister Pema Khandu,
Manipur Chief Minister N. Biren Singh,
Assam Chief Minister Sarbananda Sonowal aser
Minister of State for Culture Mahesh Sharma