India tsür designer-i Geneva nung fashion show ayongzüktsü

New Delhi, September 02 (Agencies): India tsür designer Pria Kataria Puri-i Heart For India foundation (HFI) nüngtem nung Geneva nung fashion show ka ayongzüktsü.

Lai, iba sentong ajanga nüburtem nem mapa tajung nung shilem agitsü asoshi tetuyuba agütsütsü, ta ashi.

Princess Francoise Sturdza-i tentetba HFI ajanga lajartem anepalua intetdaktsüba nung shilem tulu agir. Iba ya ajanga lajartem taküm nung temelenshi tajung jenti adokdaktsüdar. HFI nung Puri ya promoter aser ambassador ka ama inyaker.

“HFI-i parnok tenzüker küm 10 ajungba sentong November ita nung amungba mapang parnok tebilemba tajung kar lemsateptsü sentong lir. Iba sentong nung ni Dubai, San Francisco aser Delhi nungi fashion sapurtema jaoka tendaktsütsü,” ta 2013 küm Priyanka Chopra aser Mahie Gill na atema “Zanjeer” film nung sobutsü design sütsüla, Puri-i IANS osangbenertem dang ashi.

“Princess Francoise Sturdza künati iba sentong asoshi mapang jenti endokogo aser nüburtemia angateta nungittsü imlar,” ta lai shisem.

Princess Francoise Sturdza o Puri na meteteper joko küm ti jungogo.

“HFI atema ambassador ka ama inyakba ya ni kanga pelar aser nüma tanga bilemer,” ta laisa ashi.

“Kü mapa ajanga HFI den yariteptetba asoshi ni kanga nüma tangteter,” ta Aishwarya Rai Bachchan, Priyanka Chopra, Katrina Kaif aser Tabu nunger nema süoshi design sütsüla, Puri-i ashi.