India tsür Hockey aser lasang kahshishiba

Rio de Janeiro, August 7 (Agencies) : Tan Olympic nung Deobarnü India tsür hockey team mezüngbuba asaya Japan den asayadang telok anaprongi goal anana (2-2) yok.
Japan atema Nishikhori Emi-i minute 15 buba nung goal ka yok aser iba sülen Mie Nakashima-ia minute 28 buba nung goal ka yoka Japan-i akoktsü amai liasü. Ajisüaka India tsürtemi kanga meranga asayba ajanga minute 31 buba nung Rani Rampal-i India atema mezüng goal yok aser iba sülen ano minute 40 buba nunga Lilima Minz-i India atema goal ka yoksemba ajanga telok ana asaya tatem dang 2-2 nung tembang.
Mezüng Japan tsürtemi goal ana yokba sülen India tsürtem tezü dang alu ajisüaka asaya tesadang tanabuba nungi parnoki kanga meranga asayatsü tenzüka Rani-i parnok atema mezüng goal yokba sülen kanga jangrabangra asayaba ajanga tanabuba goal-a yoktet.
Lilima-i mezüng zükoktsüba ball ka Japan goalkeeper-i nokdang ajisüaka iba ball meyipa atokbaji  captain P. Sushila Chanu-i Lilima nemsa pass agüja tanabuba goal ji yok.
Iba sülen India-i aiben goal yoktsü merang, ajisüaka Japan tsür defence kanga tashi itba aliba ajanga asaya tatem tashi nung goal talila ka danga meyokteti kasasa nung tembang.
Lasang kahshishiba:
Ano Langsang kahshishiba nung Deobarnü Olympic shooting centre nung India tsür telok, Deepika Kumari, L. Bombayla Devi aser Laxmirani Majhi nungeri Colombia tsür madak 205-197 agi takok anguba ajanga parnok Rio Olympics quarter-finals tongogo.
India tsür parnok asemi tetenzükdang nungi kanga junga tenzüka mezüng set nung 52-51 agi akok. Iba set nung India-i bulls eye nung khen aser Colombia-i anaben kahshi.
Tanabuba set nung Colombia tsür telok Carolina Aguirre, Maria Ana Rendon aser Natalia Sanchez nungeri 50-49 agi India akok. Iba set nung telok anaprongi point 9 asembenben angu.
Ajisüaka ano set tasembuba nungbo India tsürtemi kanga junga akahba ajanga 52-52 nung tembang. Iba set nung telok anaprongi bulls eye nung khen khen kahshi aser point 9 nung India-i asemben saka Colombia-ibo pezüben kahshia liasü.
Tatembang buba set nung India-i kanga junga kahmesotsü tenzük aser parnoki point 52 ngutet. Iba set nung parnoki 9 nung pezüben kahshi ajisüaka Colombia-i point 44 dang nguteta India tsürtem quarter-final-i aitsü maongka ngutet.