India tsür hockey team-i 3-2 agi Korea madak takok angu

Incheon, Metsüremi 06 (Agencies): Sangtennü (Tuesday) tetsür hockey asayamung game pungo asayatsü aliba tanabuba asaya nung India team-i South Korea team madak 3-2 agi koka series 2-0 agi tejakdang sür asayadar.
Iba asaya nung India tsür Poonam Rani (minute 6buba), skipper Rani (minute 27buba) aser Gurjit Kaur (minute 32buba) nung India team atema goal inokja liasü. South Korea team nungia Yurim Lee (minute 10buba) aser Jungeun Seo(minute 31buba) nati goal ka ka idaktsü.
Iba asaya mezüngbuba quarter nung South Korea team-i goal idaktsütsü asoshi maongka tajung nguteta liasü. Parnoki Penalty corner ana anguba nungi Yurim Lee-i minute 10 buba nung goal ka inokja India den score 1-1 aküm.
India team kanga dang pressure nung asayaba mapang ka nung India captain Rani-i goal ka idakja lar team 2-1 agi tejakdang kümdaktsü.
Iba sülen minute 31buba nung South Korea tsür Jungeun Seo-i field goal ka agüja team ana tsüngda goal 2-2 ta kasa aküm.
Ajisüaka, India team nung forward asayartemi ball kanga junga benshia asaya aser minute 32 buba nung parnoki penalty corner ka angu, koba Gurjit Kaur-i idakja score 3-2 aküm.
Asaya minute 25 anunga aliba mapang, South korea team-i India defence adena ball bener lua penalty stroke ka minute 35buba nung angu, saka parnok asoshi tia maka India goalkeeper Swati-i penalty stroke ji nokdanga liasü.
Yangtepnü (Thursday) India aser South Korea na tasembuba match asayatsü.