India tsür ka nem ‘Changemaker’ award agütsü

New York/New Delhi, Sept. 25 (Agencies): Mongolbar aonung New York nung Bill & Melinda Gates Foundation-i India tsür ka nem “Changemaker” award agütsüogo.
Aiür chanu, Payal Jangid-i Rajasthan kübok lar yimdak tanur asüdangyongi kibong kümdaktsüba anema raraba atema la nem iba award agütsü.
Goalkeepers Global Goals Awards sentong nung la nem iba award agütsüba sülen Bill & Melinda Gates Foundation-i twitter ajanga, “Tanur nem mapa inyakdaktsüba aser tanur asüdangyongi kibong kümdaktsüba anendaktsütsü atema lai inyakba mapa tajung reprangteta la nem iba award agütsü,” ta metetdaktsü.
Bill & Melinda Gates Foundation indang twitter account nung post asüba video ka nung Jangid-i Jaipur nungi kilometer 100 shi pilar aliba Hinsla yimdak tetsürtemi tayongzükba balala ajangshiba indang lemsatepa lir.
Jangid-i, “Ozü yimdak onoki timtem aika ajangshir, talisa tetsürtem kimai ayazüka moudaktsüba den study mesüdaktsür, aser anojungi kibong kümdaktsür,” ta ashi.
Jangid’er tsüraburtemi la anojungi kibong kümdaktsütsü merangba mapang nungi tenzüka lai tanurtem anojungi kibong kümdaktsüba anema rara tenzük. Payal-i tanur asüdangyongi kibong kümdaktsüba anema jembiba dang masü saka tsüraburtem danga pei chirnurtem nem shisaliok agüjang ta ajungshir.
Laisa, “Onoki lokti senden ayonga agir, posters aser paint walls ajanga osang proker aser kibong shia dangi tua jembir. Onok nem shisaliok magütsübaji taintem nem angatetdaktsütsü atema onoki kanga meranga inyaktsüsa aküm,” ta ashi.
“Alima nung shisaliok mebushir tanur ajak yaridaktsüner aser loktiliba nung renloktsü atema maongka agütsüdaktsüner,” ta lai ashi.
Yimdak Mayor nem timtem onük balala metetdaktsütsü atema yimtsüng balala nungi züngsem 50-i akümba Children’s Parliament lir aser Parliament lenirji Payal lir.
“Onoki mener timtem onük balala nung o lemteper aser itemji bentettsü atema meranger,” ta laisa ashi.