India tsür ka Washington tenüng nung US pageant-i aitsü

Washington, July 26 (Agencies): America tsüri asoba, India tsür aser child abuse nungi jenteter, Priya Gopal-Walker-i Washington yimti tenüng nung Bahamas nung akatsü aliba ‘2015 Miss Teen USA Pageant’ nung shilem agitsü.
Arishi küm 17 tain, Gopal-Walker ya August 21 nungi 22 tashi akatsü aliba tetoktepba nung US rangben nungi tobur tajung adenshirtem den tokteptsüba lir. Washington Teen USA nung temaba jenjang nung takok anguba ajanga la iba tetoktepbai aitsü asoshi maongka ngutet, ta India West portal osang ajanga metetdaktsü.
Gopal-Walker tetsü ya America tsür lir aser la ya dang Seattle nung Academy of Arts & Sciences nung kaketshir ka lir.
Iba tetoktepba nung la 2012 küm adentsüba liasü saka physical aser emotional abuse asüba ajanga la medentettsüsa aküm, ta osang ajanga ashi.
Lai iba korang anguba ajanga kibong nung mangatettep adokba anema raraba nung shilem agitsü, ta ashi.
“Ni shisatsü nung timatemba süngjemtsü asoshi mapang agitsü ta ni meteta liasü,” ta Gopal-Walker-i ashiba olen ka portal ajanga metetdaktsü.
“Kü shisatsü akhi ama shilangtsü ni mapang peria agi aser ibaji ajanga ni taküm iba takok ya angu ta ni amanger. Ni ajanga tanur tetsübu agi sünga alirtem nem teyimla ka bentsür arur,” ta lai ashi.
“Ni tang tangar kibong ka den alir saka parnoki ni par jala amai meimer,” ta Gopal-Walker-i ashi.