India tsür raksatsür Nigeria nunger ka puogo

Bengaluru , October 20 (Agencies): Nigeria nunger tebur kati arishi küm 19 tetsür ka taküm raksatsüba atema Bengaluru police-i pa apuba sülen asüngdangyaba mapang Interpol-i pa tenüng nung notice agütsüba osang jangjaogo.

Tai tonglokja alisangji Nigeria, Lagos kübok Festac Town nungi arishi küm 28 Christian Chidiebere Chukwu lir ta jangjaogo.

Par medemer ki ka nung lai tetsür ka tashiyim amshia taküm raksatsüba atema tai tonglokja lir. Iba mapang nungji Chukwu’er medemsang aser pa kinungtsü nabo kidangji maliasü, ta Bangalore Mirror osang ajanga ashi.

Iba tatalokbaji taküm August ita Bengaluru nung ataloka liasü.

Iba sülen tetsürlaji mozükidang amung. Lai Chukwu anema ken o benokba sülen pa apu aser anogo 40 nü judicial keti yokba sülen police-i asüngdangyaba mapang Interpol-ia pa anema red corner notice agüja lir ta Bengaluru police-i meteta aküm.

2013 küm Chukwu India-i medical attendant visa bener par kinunger Loveson Chingrom Emesowum den aru aser Mizoram nung kinunger ka den külemi ali.

Ajisüaka pa India nung alitsü temelaba agüja aliba mapang dak alia aliba ajanga Mizoram nung Aizawl police-i pa apu. Aizawl police-ia pa meyipa yoktsü acha ayanga liasü. Pa Mizoram nungi Bengaluru-i aruba sülen TC Palya nung medemer ka aser pa kinungtsü den külemi liasü. Chukwu-i pa mepudaktsütsü asoshi Bengaluru nung tesem aiben melenshia ali.

Kenü anogo par medemsang aser kinungtsü naji ajungben nüngdak ka atema ao. Iba maongkaji agia Chuku-i par mendemsang kinüngtsü’er medemlaji tashiyim amshia taküm raksatsü.

Iba tatalokba sülen Bengaluru police-i pa apu.

Police-i ashiba agi, pai paji shishilembar ka ta shia police ashioktsütsü merang. Pa ano ken o aika nung aibelena alitsü südi ta mulung melemi maneni bushisüngdangdagi.

Pa linük nungi meyipa yoktsüji tangbo mapang agitsüsa kümogo.

“Pa apuba osangji Aizawl police aser embassy nem-a metetdaktsütsü. Chukwu ya tashiyim amshia tetsür raksatsüba ken o nung apu asünungji, iba ken o metembang tashi pa linük nungi meyoktsü, ta police ketdangser kati ashi.