India tsürtem Asian Squash final asayatsü

India’er tetsür squash asayar, Joshna Chinappa (Abelen)-i Hong Kong No.1, Annie Au tsükdaktsüba sülen Dipika Pallikal-ia Joey Chan madak takok ngua India’er tetsür teloki tang tasyadak Asian Squash Championship final asayatsü jenjang ajangzük. (Taipei, May 14)

Taipei, May 14 (Agencies): India’er tetsür squash asayar teloki takok ngua tang tasayadak Asian Team Squash Championship final asayatsü jenjang tanü, Honibar nü ajangzükogo.
Ajisüaka, India’er tebur telokibo Pakistan madak takok monguteti semifinal asaya nung tsüka liasü.
Joshna Chinappa aser Dipika Pallikal napronglai takok anguba ajanga par teloki temaba jenjang nung alir Hong Kong tsürtem madak takok anguba sülen Malaysia tsürtem den final asayatsü jenjang nguogo.
Tanü mezüngbuba asaya nung Sachika Ingale-i Liu Tsz Ling madak takok monguteti India telok jenjang mejungi kümdaktsü saka Joshna-i Hong Kong No.1, Annie Au tsükdaktsüba den külemi, Dipika-ia Joey Chan madak takok anguba ajanga India tsürtemi tanü asayaji kokadok.
Tebur semifinal asaya nung Velaan Snethilkumar-i Farhan Mehboob madak takok ngua India temaba jenjang nung ajungkettsü saka Harinder Pal Sandhu-i Farhan Zaman mekoktetba den külemi, Kush Kumar-ia takok mongutetba yong India’er tebur teloki tanü tamakok ajurutsüsa aküm.