India tsürtemi Bangladesh koka ICC Women’s World Cup-i iogo

Colombo, February 17 (Agencies) : Hokolbarnü Nondescripts Cricket Club nung ICC Women’s World Cup qualifying match nung India tsür cricket team-i Bangladesh team wickets 9 agi koka England nung June 24, 2017 nü nungi tenzüka asayatsü aliba ICC women’s World Cup 2017 nung asayatsü jenjang ngutetogo.
ICC women’s World Cup qualifier mapang Mithali Raj-i aniba India team-i Super Six nung point 8 ngutet. Item point nung ya preliminary league asaya nung anguba point ana densema lir.
Fast bowler Mansi Joshi aser leg-spinner Devika Vaidya nati wicket pungugu agia Bangladesh nem 155/8 ang yangludaktsü.
Bangladesh nungi Fargana Hoque-i runs timba yanglu, lai ball 107 nung runs 50 yanglutet.
Bangladesh tamasa bat südaktsüba sülen India team-i over 33.3 nung nisung ka out sür runs 158 yanglu. India nungi opener Mona Meshram-i runs 78 (not out) yanglu. Lai four runs 12 azük. La cricket asayatsü tenzüker tanü yangluba runs ya timba lir.
La den ano Mithali-ia runs 73 (not out) yanglu. Lai four runs 10 azük aser ibai la asoshi ODI half-century 43buba lir.
Ano P. Sara Stadium nung asayaba tanga asaya ka nung South Africa-i Sri Lanka madak wickets 9 agi takok ngua world cup nung asayatsü maongka ngutetogo. Pakistan-ia Colombo Cricket Club nung Ireland madak runs 86 agi takok angu.
Bangladesh aser India na asayadang anguba score tatsü agi yamai agütsür:
Bangladesh: 155/8 (Fargana Hoque 50, Shamin Akhter 35, Mansi Joshi 3/25, Devika Vaidya 2/17) India: 158/1 (Mona Meshram 78 not out, Mithali Raj 73 not out).