India tsürtemi Malaysia koka final tongtetogo

Donghae City, Monupii (May) 17 (Agencies): 5buba Women’s Asian Champions Trophy nung Defending Champions India tsürtemi asaya asembuba atonga koka Sunrise Stadium nung Malaysia tetsür team 3-2 agi Yangtepnü kokogo.
India team-i taoba mapang nung Japan 4-1 aser China 3-1 agi koka lir. Asaya asem tashi akokba sülen India Amungnü final atema table toppers ama point 9 nguteta qualify süogo.
Iba asaya nung India tsürtem atema Gurjit Kaur (minute 17), Vandana Katariya (minute 33) aser Lalremsiami (minute 40) nungeri goal kaka indaktsü aser Malaysia team atema Nuraini Rashid (minute 36) aser Hanis Onn (minute 48) nati goal kaka agütsü.
Mezüngbuba quarter nung team anapronglai penalty corners nguteta asaya aser asaya tenzüker mezüngbuba minute nung India team nem penalty corner ka agütsü, saka Malaysia team-i kanga junga nokdang.
India-i warm-up asaya nung Malaysia team 6-0 agi koka lir aser parnokisa penalty corner specialist Gurjit Kaur ajanga mezüngbuba goal idaktsü.
Asaya nung minute 33buba nung Vandana-i ball kanga junga belenshia beneria goal tanabuba idaktsü.
Iba sülen defender Deep Grace-i penalty corner ka mena koba Malaysia tsür Nuraini Rashid-i ayong ayonga idaktsü.
India tsürtem atema iba sülen minute asem lir penalty corner asem tashi angu saka parnoki goal magütsütet.
Kasa mapang nung skipper Sunita Lakra-i long pass ka striking circle-i yokba forward Lalremsiami-i deflect sür goal idaktsü.
Iba goal idaktsüba sülen goal 3-1 aküm. Hanis Onn-i par telok atema tanabuba goal idaktsü saka parnoki goal draw asütsüba mesera asaya akoktsüsa masaystet.