India tsürtemi U-18 Asia Cup bronze medal agizükogo

Bangkok, December 22 (Agencies): India’er tetsür hockey teloki goal 3-0 agi Korea tsürtem madak takok ngua, 4 buba Women’s Under-18 (U-18) Asia Cup, 2016 asayamong bronze medak tanü, Brehostibar nü agizükogo.
Tanü tasembuba jenjang ajangzüktsü asaya mezüngbuba shilem nung telok anapronglai goal kata magütsüteti kasa jenjang ngua asaya.
Asaya tanabuba shilem tenzüker minute ishika tsüngda nung Ritu-i penalty corner goal takok ngua agüja, India telok temaba jenjang nung ajungkettsü.
Asaya tenzüker minute 55 buba nung Lalremsiami-i pass tajung ka Sangita nem agütsüba sülen lai Korea defender 2 tashi ajangdang lua, par India telok asoshi 2 buba goal agütsü.
Sangita-isa asaya tenzüker minute 58 buba nung 3 buba aser takokba goal agüja, par India telok nem tanü asaya kokdaktsü.
Tan asayamong nung 3 buba jenjang ngua, India nem konang bener arutsüba nüngtem nung Hockey India (HI)-ia tetsür asayar shia nem sen lakh kaka senpet aser asayartem den yariteper shia nem sen 50,000 senpet agütsütsü renemba osang sangoktsüogo.