India tzüji Pak leni meyimdaktsütsü: Modi

Bhatinda (Punjab), November 25 (Agencies): Hokolbarnü Ato kilonser, Narendra Modi-i, Indus Water Treaty tezüngzüktep kübok Pakistan tsütsüleni ayimba tzü amshitsü atema India temeten lir, ta metetdaktsü.
Punjab, Bhatinda nung All India Institute of Medical Sciences (AIIMS) ka amenoktsü atema lung azüngtsüba sentong nung Modi-i Pakistan dang, sensaktia, ochimashi aser black money anema nenoki India den rara ayongzükang, ta ashi.
“India temeten aliba tzüji Pakistan nung yimoker. Tzü ayimbaji nokdanga Punjab, Jammu & Kashmir aser tanüngba India nung aluyimertem amshitsü atema ni inyaktsü,” ta Ato kilonseri lokti dang metetdaktsü.
Tamalen sorkartemi tzü onük atema meinyak ta aija Modi-i, “Delhi nung taoba sorkartemi mejanga liasü. Asen aluyimertem jepa dang liasü aser tzüji maneni Pakistan nung dang yimok. Asen aluyimertem temeten atema onoki raratsü,” ta ashi.
“Indus Water Treaty- Sutlej, Beas aser Ravi ayong asemprong nung asen aluyimertem temeten lir, saka parnoki iba tzü magiteter. Item ayong tzü temetenji India aser asen aluyimertem ket nung lir. Iba tzü ya Pakistan adener tzüyim nung yimoker. Pakistan-ia item tzü mamshiteter aser asen aluyimertemia mamshiteter,” ta paisa ashi.
“Punjab nung aluyimertemi tzü peria ngura parnoki ali nungi hon adokdaktsütettsü aser ibaji ajanga linük senpong asüngtsü,” ta paisa shisem.