India, UK-i amalitepa kiralongra anema raratsüla: Tir Pranab

New Delhi, November 08 (Agencies): India aser United Kingdom nati taliba longjemer kiralongra anema raratsüla, jiralongra ya alima yimjung atema tayongzükba tulutiba lir, ta Tir Pranab Mukherjee-i ashi.
Yasüng British Ato kilonser, Theresa May-i Tir Pranab ajurua liasü, aser iba mapang nung Tiri, linük ainba aser rongsenkettsüng ainba nung India-i UK ji tongtibang partner ka ama repranger, ta ashi.
“India-i UK nung aliba company temi linük programmes- Make in India, Skill India, Digital India ama nung sen intoktsü ajungshir,” ta Tiri jembiba osang tanü Rashtrapati Bhawan nung otongdari sangdong ka ajanga metetdaktsü.
“Alima yimjung atema tetsükdaktsü tamajungtibaji kiralongra lir. Iba (kiralongra) yagi litsü mesüra arrtsü kecha memetet,” ta paisa ashi.
“Kiralongra anema raratsü atema India aser UK nati taliba amalitepa inyaktsüla. Kiralongra anema raratsü asoshi alima linüktemi temelungetba sayutsüla,” ta pai Theresa May dang ashi.
Tir Pranab-isa, linük ana tsüngda goods & services nung taliba shishilembatsü atema lenmang lir, ta ashi.
2015-16 küm India aser UK na tsüngda shishilembabaji US sen billion 14 liasü.
UK Ato kilonser pelaa agizüka Mukherjee-i, European Union adener lai India mezüng semdangtsü lemtetba atema pelar, ta ashi.
International onük aika nung India aser UK na tangatetba kasa lir, ta paisa shisem.
Pranab-i, “Rongsenkettsüng aser senotsü nung tesentaktep tashi itta lir, defence aser international security partnership indar. UN Security Council nung India permanent züngsem akumtsü atema UK-i pusemba atema pelar,” ta ashi.
Tiri tebilemba onüktem lemsatepba atema pelaba metetdakja UK lenir May-ia, lai India semdangba ajanga linük ana tesentaktep junga aliba sayur aser UK-i tarutsü tesentaktep yangertsü atema nükjidong lir, ta ashi.
“Investment aser shishilembaba nung linük ana atema maongka aika lir. UK-i India den tongtibang partner ka kümner, koba ajanga linük anaprong ajangzüktsü ta British Ato kilonser-i shiogo,” ta Rashtrapati Bhavan otongdarisa metetdaktsü.