India, UK-i kiralongra anema raratsü

New Delhi, November 07 (Agencies): Hombarnü India aser Britain nati kiralongra anema raratsü nangzükba den külemi ozüng alema inyakertem peipei linük nungi mejendaktsütsü atema bangjemtepogo.
Tang mezüng Britian Ato kilonser, Theresa May-i Europe adener tanga linük ka (India) mezüng semdangdang Ato kilonser, Narendra Modi den senden amen. Iba mapang nung ketdangsertemi India-i bushiteta aliba alima ozüng alema inyakertem tenüng 57 agütsü.
Modi den ghonda asem ken o balala jembiba sülen linük anapronglai shishilembaba tesentaktep tajungba akümtsü bangjemogo.
Theresa May-i ashiba agi, lai semdangba mapang India aser UK nati GBP billion 1 (India sen crore 83,00) indang tezüngzktep agitsü.
Kasa senden nung visa inyakyim tezübaba akümtsü, security aser defence nung amalitepa inyaktsü linük anati bangjem.
Modi aser May natisa tesem aser International tebilemtsü onüktema jembi, iba nungji  South Asia azükarutsü aser kiralongra malitsü atema densema lir.
Tena senden tembangba sülen külem sangdong ka ajanga, “Ato kilonser anapronglai International yimjung aser security atema kiralongra ya amokmeren tulutiba rongnung ka lir ta bangjemogo, aser iba dak sentakba nung alima linüktem dang longjemer inyaktsü ayongzük,” ta metetdaktsü.
Yasüng May New Delhi tonga aruba sülen tanep lai Modi den külemi UK-India Tech Summit tenzüktsü. La asüng Bengaluru-i aotsü aser yangji business sentongtem nung adentsü.