India & UK nati kiralongrar teloktem anema inyaktsü

London, Rongchii (April) 18 (Agencies): Prime Minister Narendra Modi aser British Prime Minister Theresa May nati tanü Brexit sülen Indo-UK tesentaktep akangshitsü atema telemtetba agiogo.
Modi aser May nati Pakistan nung amenoka aliba Jaish-e-Mohammad aser Lashkar-e-Taiba kiralongraba teloktem anema mapa inyaktsü telemtetba agi.
India aser UK nung kiralongraba maparen khukhua aitsür aser kiralongraba ya tamangba yimsü, kin, linük aser meimchir telemsa kecha dena sendakteptsü makok, ta tenatisa bangzünga renem.
LeT, JeM, Hizb-ul-Mujahideen, Haqqani Network, al-Qaeda, ISIS aser parnok den yaritepba teloktem nem mapa meinyakdaktsütsü, züngsem maniokdaktsütsü aser tai maketba nisungtem amakba anendaktsütsüla. Iba atema linük ajaki kiralongrartem inyaksangshi, senotsü teyari aser parnok senzüsenbongba noktangtsüla ta lennir anatisa telemtetba agi.
Downing Street nungi sangdong ka agütsüba nung “2016 küm Prime Minister-i India semdangdang defence aser security tenangzüktep agiba ajanga linük ana tsüngda tesentaktep akangshiba lennir anati meyipa reprangshi” ta metetdaktsü.
“Brexit sülen India-i UK den tesentaktep meraksatsü aser London yimti ya India atema kanga dang tongtipang tesem ka lir ta PM Modi-i ashi” ta sangdong nungsa shia lir.
“Prime Minister May-ia Modi dang UK-i EU toktsüaka 2020 tashi India company temi tetsükdaktsü kecha melii shishilembatettsü ta metetdaktsü” ta Downing Street sangdong nungsa shia lir.