India-US Defence atema US House-i US sen bn 600 bill agizük

Washington/New Delhi, July 15 (Agencies): India den Defence nung amalitepa inyakba tashi itshitsü atema US House of Representatives-i US sen billion 621.5 indang defence policy bill agizükogo.
Indian-American Congressman Ami Bera-i yanglushia benokba bill ji US House-i voice vote ajanga agizük. Iba bill ya National Defense Authorisation Act (NDAA) 2018 dak sendakba ka lir aser iba ya taküm October 1 nungi mapa küma tenzüktsü. NDAA-2018 ji House nung vote 344-81 agi agizüka liasü.
India dak sendakba amendment ji House-i agizükaka Secretary of Defence-i Secretary of State den jembitepa agizüktsü, koba ajanga United State aser India tsüngda defence nung amalitepa inyakba tashi itshitsü.
Bera-i, “United States ya alima nung democracy tejentiba lir aser India ya alima nung democracy tulutiba lir. Linük ana tsüngda defence nung amalitepa inyaktsü atema asalentong yanglutsüji kanga tongtibang,” ta ashi.
“US aser India na amalitepa inyakba ajanga asen defence tashi taitba akumtsü aser 21buba aso nung security tayongzükbatem koktettsü,” ta paisa ashi.
National Defence Authorisation Act agizükogo, aser iba sülen, US aser India tsüngda defence nung amalitepa inyaktsü atema asalentong yanglutsü atema Secretary of Defence aser Secretary of State na asoshi anogo 180 lir.
NDAA ya Senate-i agizüktsüla, iba sülen ang White House-i yoka ozüng ka akumtsü atema US Tir, Donald Trump-i sign asütsü.
Taoba NDAA-2017 ajanga India ya tongtibang defence partner ka lir, ta sangdonga liasü.