Dimapur, May 25 (TYO): India nunger wicketkeeper mongin, Kiran More-i Dimapur nung tentetba Nagaland Cricket Academy (NCA) semdangba osang ka Abu Metha, General Secretary, NCA-i tanü sangdong ka ajanga metetdaktsüogo.
NCA-i ayonger külen Dimapur kübok Nagaland Cricket Stadium nung tagidak Under-16 (U-16) cricket asayartem nem cricket asayatsü tesayuba agütsüba sentong nung More-i densemba osanga jangjaogo.
India kübok North East Region ajunga nungi U-16 cricket asayartem nem tesayuba agütsütsü mapatong ya India ajunga nung cricket asayatsüren ketdang asür, Board of Control for Cricket in India (BCCI)-i nungita agitsü tenzüka lir.
Cricket asayatsüren toktsür alisang, More ya cricket sabang nung national aser international otsü jenti yanglur asayar ka lir aser pai tan mezüngsüa Nagaland semdanger lir.
Taoba India international asayar, More-i cricket asayatsü terenemshitsü agirtem den ajurutepa parnok nem tesayuba agütsüba den külemi, NCA ketdangsertem den senden ka mena liasü.
“North East India nung cricket asayatsü sempet tajung alir lanur jenti lir aser tarutsü anogotem nung North East asayartemi India tenüng nung takok ngua shilem agitsü,” ta More-i metetdaktsü.
“Lanurtemi temaba jenjang nung shilem agitettsüsa parnok asoshi cricket asayatsü ki o jen peria renemtsüba den külemi, terenemshiba tajung agütsütsü ajungshir,” ta pai tajungshiba olen ka ashi.
“Nagaland Cricket Stadium aser NCA na nung cricket asayatsü ki o jen aser osettsüset peria aliba ngua kanga pelar,” ta shia, NCA-i cricket sabang temaba jenjang nung ajungkettsütsü asoshi meranga inyakba atema pelaba olen ka More-i lemsatepa liasü.
“Ni Nagaland tanaben semdangtsü nangzüker,” ta shia, tarutsü mapanga pai cricket sabang temaba jenjang nung ajungkettsütsü asoshi nungdakba teyari agütsütsü tenangzükba olen ka More-i metetdaktsü.
You must be logged in to post a comment Login