India ya akhidang nungi ‘Hindu Linük’ lir: UP Minister

Ballia, June 10 (Agencies): Honibarnü Uttar Pradesh nung Agriculture minister, Surya Pratap Shahi-i, India ya ‘Hindu Linük’ ta sangdongtsü menüngdak, kechiyong akhidang nungi iba linük ya Hindu linük lir, ta ashi.
Sentong ka nung jembidang pai, “India ya akhidang nungi Hindu linük lir. Anungji iba takhangba agütsütsüji menüngdak,” ta ashi.
Ajisüaka iba sentong nung adener Salempur nungi BJP MP, Ravindra Kushwaha-ibo iba onük nung ola madok.
Osangbenertem den jembidang Shahi-i, opposition party temi Madhya Pradesh kidanger state tem nunga aluyimertem longkak aittsü ajungshir, ta aitsü.
Tasüngdangba ka langzüdang Shahi-i Madhya Pradesh nung aluyimertem dang longkak maittsü aser azüoktsü mepishi.
“Shivraj Singh sorkar mapang nung aluyimba tsütsü ainba shilem 7 aliba nungi 18 tashi kümogo, aser item ajakji sorkari aluyimertem atema inyaktsüba ajanga lir. Congress-ibo ibaji küm 55 yimsüsüba mapang nunga meinyaktet,” ta pai ashi.
Paisa, UP sorkari aluyimertem atema mapa balala inyaktsüba metetdaktsü.
Madhya Pradesh nung timtem adokdaktsübaji Congress aser opposition party tem ajanga lir ta shia BJP MP, Kushwaha-ia, “Parnoki jelia asalentong yangur aluyimertem ajungmeso,” ta aitsü.