India ya alima nung yimjung osangbener ka lir: PM Modi

New Delhi, October 29 (Agencies): India ya alima nung yimjung osangbener ka lir, ta shia Deobarnü Ato kilonser, Narendra Modi-i, India linüki mapang ajak nung U.N. Missions ajanga alima nung yimjung, telongjem aser tesünep atema inyaker, ta ashi.
U.N. peacekeeping missions nung nübo timtiba yokba tasembuba jenjang nung India lir; India-i alima tesem ajaklen mission balala atema security sepai 7,000 yoka lir, ta Ato kilonser-isa metetdaktsü.
Ita shia radio ajanga jembiba ‘Mann Ki Baat’ sentong ajanga jembidang Modi-i, India nunger sepaitemisa linük 180 nungi sepaitem nem peacekeeping training agütsür aser linük aika nem medical teyari agüja arudar, ta ashi.
Minute 30 jembiba sentong nung Modi-i ‘Chhat’ ama benjung ajanga India-i alima tzümopung atema inyakba aser Swachh Bharat indanga jembia liasü.
Sardar Vallabhai Patel-i linük telongjem atema inyakba tetshia Modi-i nüburtem dang October 31 nü Patel asoba anogomong nung “Run for Unity” nung shilem agitsü ayongzük. Kasa anogo ya Indira Gandhi asüba anogomong lir.
Jawarharlal Nehru asoba anogo, November 14 nü Children’s Day amongtsü aliba dak sendakba nung Modi-i, tanüasüng tanur aika diabetes tashidak agi shirangba atema tebilemtsü kaa jembi.
Pai ashiba agi, diabetes ama tashidak adokba ya talisa asen libaliro dak keta lir, ta ashiba den külemi tanurtem dang anema alitsü atema moapu nung saisaopongtsü ajungshi.
Paisa tawa tembangba FIFA Under-17 World Cup nung India-i shilem junga agiba atema tenüngsang agütsü.
Indian armed forces tenüng sanga Modi-i tawa pai Jammu & Kashmir nung Gurez kübok aliba Line of Control (LoC) semdanga sepaitem den külemi Diwali benjung amongba indanga metetdaktsü.
Paisa, Indian sepaitem ya arrtsülen dang mapa melemzüktsür saka UN Missions ajanga alima tesem ajungalen yimjung alitsü atema-a inyaker, aser ibaji ajanga India nüma tangdaktsür, ta ashi.
“India ya alima atema yimjung osangbener ka lir, aser India-i alima nung yimjung, telongjem aser tesünep atema teti inyaka aruogo. Nisung ajak yimjung aser tesünep nung alitsü aser tarutsü tia tajungba akumtsüji asenok taginüba,” ta Modi-i ashi.
Paisa, August 2017 tashi nung India-i UN peacekeeping operations 71 nungi 50 nung shilem agiogo, aser item operations ji Korea, Cambodia, Laos, Vietnam, Congo, Cyprus, Liberia, Lebanon aser Sudan linüktem nung lir; ano India tsürtemia iba maparen nung shilem agiogo, ta ashi.
Congo aser South Sudan nung Indian armed forces-i ketdangsüba hospital balala nung shiranger 20,000 dak tema anepaluogo, aser parnok timbaka taküm kümzükogo, ta paisa ashi.
“Mahatma Gandhi aser Gautam Buddha nunger soa intetba linük nungi sepaitemi alima tesem ajungalen yimjung aser tesünep osang prokogo,” ta pai ashi.
Modi-isa, U.N aser Indian Constitution na mesüktepba, U.N. Declaration of Human Rights, Margaret Elizabeth Nobel indang otsü aser Delhi nung khadi ayokba indang jembia liasü.
“‘Mann Ki Baat’ sentong ya aikati tenüng asanger aser khenkhenbo aitsür. Ajisüaka ‘Mann Ki Baat,’ ajanga tajung atalokba ni angur; iba sentong ajanga nüburtem den sendakteptsür,” ta Modi-i ashi.
Ato kilonser, Modi-isa tawa asayaba Asia Cup Hockey aser Denmark Open Tennis tournament indanga jembi.
Paisa, küm 10 sülen India-i Asia Cup nung takok anguba, K. Srikanth-i Indonesia Open aser Australia Open sülen Denmark Open nung takok anguba atema tenüngsang agütsü.