India ya Hindu linük lir: Mohan Bhagwat

Guwahati, Aenjeti 22 (Agencies): Rashtriya Swayamsevak Sangh telokakba Mohan Bhagwat-i Amongnü ashiba agi, India nungeri Pakistan den tsükchitepba ajak amadokogo, saka kidanger linük-i India nungeri bilemba ama mibilemer. Guwahati nung RSS ‘swayamsevaks’ sentong nung jembidang pai ashiba agi, Hindu tamangba yimsü renloka ao tashibo India taküm alitsü.
“Timtem aika ajuruogo aser iba sülen Pakistan kümtet. ‘Bharatvarsh’-i Pakistan den tsükchitep ajak Luroi (August) 15, 1947 küm amadokogo. Ajisüaka Pakistan nungeri tang tashi mamadoki lir. Hindu aser tanga tamangba na tebendangji iba ya lir,’ ta bhagwat-i rally nung ashi.
Bhagwat-i ashiba agi, civilization tejentem; Mahenjodaro, Harappa aser asen sobaliba ajak tang Pakistan aliba tesem nung tenzük. “Kechiba Pakistani-i India dang ‘Bharat’ melena tanga tenüng ka agitsü asoshi mashi, kechiyong inyakyim ajak Pakistan nungi tenzük anungji parnoki onok Bharat agitsü aser nenok tanga tenüng ka agiang ta ashitsü asü.
“Parnoki iba ya mashi saka ‘Bharat’ tenung nungiang pilanü, kechiyong parnoki ‘Bharat’ tenüng den Hindutva sendaktepa lir, ta meteta liasü. Hindutva aliba ajanga ‘Bharat’ lir,” ta pai ashi.
RSS tekolakbaisa ashiba agi, India nung shilu balala aser telemsa balala liaka Hindutva ajanga longjemdaktsü. “Hindutva dak ajemdaker asenok yongtsü nung telongjem lir aser iba ajanga India ya Hindu linük ka lir,” ta pai ashi. Bhagwat-i ashiba agi, India-i alima dang humanity osang agütsür.
“Tangari jembir saka minyaker. India nungeri tangar dang koda libalirotsü aji sayur. Alima-i ‘Bharatvarsh’ dang Hindutva ta ajar. Iba yongji ‘Bharatvarsh’ nütsüngtem dang Hindu nunger ta ajar,” ta paisa maneni shisem.