India ya ‘Hindu linük’ ta sangdongtsüla: Thackeray

Mumbai, July 24 (Agencies): Tang Kashmir nüburtemi sepaitem anema raraba mapang ka nung Deobarnü Shiv Sena tongti, Uddhav Thackeray-i, India ya ‘Hindu linük ka’ ta sangdongtsüla, ta ashi.
“India ya Hindu linük, ta sangdongtsü dak alaka tanga lenmang mali. Mapang talangka India nunger tamangba tsütsü tebendang mali ta sangdonger aser iba nüngtem nung Hindu nunger kanga timtemogo,” ta pai ashi. Paisa, Centre sorkari Kashmir tensa junga mazüokteter aser BJP-i Hindu nunger atema meinyaketter, ta aitsü.
“Iba ya (Kashmir tensa) shirnok tai ajanga (?) Amarnath Yatra (Hindu nunger temeshi aieni aoba) anenogo, Hindu nunger dak azüker, sepaitem amaker. Sorkar melenba sülenbo tensa melenshitsü ta ajaki imlaa liasü,” ta Thackeray-i ashi.
“Centre aser state (Kashmir) naprong nung sorkar tashi nung aliba BJP-i ‘Tang nungibo Hindu nunger anema meinyaktsü’ ta jembi. Ajisüaka Valley (Kashmir) nung Hindu nungeri timtem ajurua lir,” ta paisa ashi.
Ato kilonser, Narendra Modi aija pai, “Asen Ato kilonseri linük nung state ajak semdanger. Ajisüaka iba ama mapang ka nung kechiba pai Kashmir nung aliba Hindu nunger atema meinyaker,” ta ashi.