India ya telemsa lokti ka kümogo: Chidambaram

New Delhi, February 27 (Agencies): Honibarnü taoba mapang Union Minister, P Chidambaram-i, tang linük nung telemsa tulu adoka aliba ajanga kanga tebilemtsü akar, ta ashiba den külemi, o toktepbaji lokti telemsa nung ajemdaker tokteper, ta ashi.
India nung telemsa kanga mejungi adokbaji asemben liasü — 1947 küm lemdangba, 1992 küm Babri Masjid tekülemi ki raksatsüba sülen aser 2015 küm lir, ta pai ashi.
New Delhi nung sentong ka nung jembidang taoba mapang Union Finance minister Chidambaram-i, “2014 küm tu tako chitepba küm ka liasü, aser 2015 küm yabo telongjem küm ka asütsü ta ni bilem, ajisüaka 2015 küm tatemlenbo iba ya telemsa tulu adokba küm ka dang liasü. Tanübo iba küm ya kangasa telemsa adokba küm ka kümogo. India lokti iba tashi akum no(?),” ta ashi.
“Yimlibilema Muslim nunger ka dang, dalit nunger mesüra ali tila ka akar den jembidangang. Asenok ya tetsübu terata lenmang nung jajadar aser telemsa lokti ka dangi odar. Onoki iba ya nenok nem shisadangdaktsüner,” ta ashi.
2015 küm pai Indian Express atema Deobar anogotem nung züluba ocettem indang kaket “Standing Guard–A year in Opposition” sayaba sülen pai item o jembia liasü.
Tanü iba sentong nung taoba Ato kilonser, Manmohan Singh, Congress tatong Tir, Rahul Gandhi, taoba mapang minister tem- Kapil Sibal, Jairam Ramesh, Shashi Tharoor, taoba Planning Commission Deputy Chairman, Montek Singh Ahluwalia, CPM lenirtem- Sitaram Yechury, T K Rangarajan aser nüngtugu obendangertem liasü.
Congress lenir Chidambaram-isa, Dadri nung atalokba nung o toktepba onükji, nisung kati par kidang nashishi achi asü machi (?) ta masü, saka lokti kati nisung ka tepsettsü temeten ali asü mali (?) ta asütsüla; Rohith Vemula ji dalit nunger asü masü (?) ta masü saka University-i pa dang tim inyak asü talitabong inyak (?) ta asütsüla, ta ashi.
Chidambaram-i, “Tangbo sademsadema jembiba atema tasüngdangba akar, ibayongji tangbo aikati temelung ulua jembitsü memelunger,” ta ashi.
“Ni kü teinyaktsü inyakra aser aitsüra, ibaji ajanga ni sorkar anemer ka akumer masü,” ta paisa ashi.
Tanü iba sentong nung Indian Express Group nungi Anant Goenka-i, Congress-i election nung tamakok angubaji Indian Express atemabo tajangzük ka liasü, kechiyong Chidambaram-i ocet aika zülutsüogo, ta ashi.