India yimtitem nung mapa mangur 11.24% kümogo: BSE

New Delhi, Sept. 01 (Agencies): India kübok densemba yimtitem nung mapa inyaktsü lenmang mangur noklang nung shilem 11.24 tashi taoba August ita akümba osang Bombay Stock Exchange (BSE) & Centre for Monitoring Indian Economy (CMIE) nati bushitetogo.
Ano, yimtsüngtem nunga mapa inyaktsü lenmang mangubaji shilem 9.18 aliba osanga jangjaogo.
India ajunga nung mapa mongui alir shilem 9.84 aliba osang BSE-i shishilembatsü osangtsüsang bendenba tentet, CMIE den aroki lungjemer bushiteta lir.
“India nung tentetba yimtitem nung mapa inyaktsü lenmang mangur noklang nung shilem 11.24 akumba osang a August ita nung bushitetogo. Taküm July ita tashi nung mapa inyaktsü lenmang mangur shilemji 10.76 aliba osang jangjaogo,” ta BSE nung MD & CEO, Ashishkumar Chauhan-i osang jangjashitsü.
India ajunga nung mapa mongui alir indang osangtsüsang bendenba sülen par tenteti tan osangji sangoktsür lir.
“India yimtitem nung mapa inyaktsü lenmang mongutetba shilem timba akümba ya khuret tulu lir,” ta Chauhan-i tebilemtsü kaa ashi.