India’er itangitsü drone tayimtsü ka anüng nungi kazüka yok: Pak

Islamabad, July 15 (Agencies): India’er itangitsü drone tayimtsü ka Pakistan mitkartemi Pakistan-i agia aliba Kashmir lushi kübok Bhimber nung tentetba Line of Control (LoC) temalen anüng nungi kazüka yokogo ta Pakistan mitkartemi tanü Bodbar nü metetdaktsüogo.

“India’er itangitsü drone tayimtsüi ozüng alema Pakistan airspace telungi aitba yong ozü mitkartemi kasaji anüng nungi kazüka yok,” ta Pakistan nung tentetba Inter-Services Public Relations (ISPR) ketdangser kati ashi.

Tan anüng nungi kazüka yokba drone tayimtsüji anüng nungi noksa agitsü asoshi India-i Pakistan lushi telungi yok ta pai metetdaktsü.

Pakistan Rangers mitkartemi India kübok Jammu district nung tentetba international border tsütsü tetsür ka injang agi kasetba anogo nung Pakistan mitkartemi India’er drone tayimtsü anüng nungi kazüka yokba osang ya metetdaktsür lir.

Pakistan Rangers mitkartemi injang yokba ajanga tetsür ka kasetba den külemi, nübur 2 aser Border Security Force (BSF) züngsem 1 densema ajak agi nisung 3 tashi tanü yirutsüba osang jangjaogo ta India’er police ketdangser kati ashi.

“Tanü yirur 3 rong nung 2 taneptsü bushia Jammu city-i anir aoba aser tanüngba yirur kaji arrtsülen, Pargwal yimtsüng nung tentetba mozüki ki nung anepalua aliba osang jangjaogo,” ta ketdangsersangi ashi.

India Ato Kilonser, Narendra Modi-i tan Hokolbar nü Jammu semdangtsü asoshi Jammu sorkari terenemshiba tulu agiba mapang ka nung Pakistan mitkartemi tanü lendongji atalokdaktsür lir.