India’er tetsür hockey teloki Rio Olympics nung shilem agitsü

New Delhi, August 29 (Agencies): India’er tetsür hockey teloki 2016 Rio Olympics asayamong nung shilem agitsü jenjang tanü Honibar nü nguogo.
Tang London nung tasayadak EuroHockey Championships final nung asayatsü jenjang England tsürtemi anguba ajanga India tsürtemi Rio Olympics nung shilem agitsü jenjang ya ajangzük.
England-i Spain madak semifinal asaya nung takok ngua final nung shilem agitsü jenjang anguba den külemi, Netherlands-ia 1 buba semifinal asaya nung Germany madak takok ngua final asayatsü jenjang angu.
Aji oda, telok anapronglai Rio Olympics nung shilem agitsü jenjang ngua aliba yong Olympics nung shilem agitsü menden ka azüngtet aser India tsürtemi iba mendenji lemzük.
Taoba July ita Belgium kübok Antwerp nung ayongba tetsür Hockey World League Semifinals asayamong nung 5 buba jenjang anguba yong India tsürtemi tanü iba maongka tajung ya ngua liasü.
Tesüiba mapang, 1980 Moscow Games nung shilem agitsü jenjang anguba sülenbo India tsürtemi tan mezüngsüa Olympics nung shilem agitsü jenjang angur lir.
Rio Olympics nung shilem agitsü jenjang ajangzüker telok rong nung India ya 10 buba akümer lir aser tanüngba telok anaji Egypt nung 2015 Africa Cup aser New Zealand nung 2015 Oceania Cup asayamong asayaba sülen ang jangjatsü.
India’er tetsür hockey teloki Rio Olympics nung shilem agitsü jenjang anguba osang ya International Hockey Federation (FIH)-ia jangjashitsüogo.