Indian Army chief-i lanurtem dang doctor aser engineer akümtsü ajungshi

Guwahati, September 28 (Agencies): Army Chief General Bipin Rawat-i Assam nungi lanurtem dang engineer aser doctor küma yimtsüng aser state yaritsü asoshi ajungshi, aser telungpur akümtsüba mesera hadir balala amshia lokti anema nokdaktsüba tebilembatem toktsütsü asoshia ajungshi. National Integration Tour dak sendakba nung kaketshirtem den pa indang office nung ajurutepa sensaksemba mapang pai iba tajungshiba agüja liasü.
Kechiba India nung aliba tanga tesem dang nungi nenok aliba tesem tatsüngzükba? Nenok yimti nung aliba school tem kechiba Delhi nung aliba memesük? Na kidangi meyipa aodang nai kechi osang bener aotsü? ta Rawat-i asüngdang.
Maneni parnok sensaksemba mapang Army chief-i kaketshirtem kwi kati Army nung adentsü asoshi jangrar, ta asüngdanga liasü. Iba tour nung shilem agirtem ya class 8 nungi 10 tashi nung azünger kaketshirtem lir aser parnok ajak Chirang district nungi lir.
“Anungji nenok meranga inyakang aser doctors, engineers kümer oa ner yimtsüng tenzükang, saka hadir balala bena arua ozüng alema inyakba balala nungi jenbua liang,” ta pai Assam nung telungpurtem tebilemtsü indang otsü dak ajemdaker iba olen ya ashi.
Kaketshirtem ya tesayur ana aser Sikh Light Infantry (SIKHLI), nungi Army ketdangser kati anir tang Delhi nung oa lir.
“Onok September 24 nü Assam nungi apuso. Kaketshirtem ajak parnok taküm nung tang mezüngbuba tayimtsü nung amenerba liasü. Parnok rongnung tesadangkatibo tangang Guwahati-ia mezüngbuba angur. Kaketshir parnok 20 prongla Assam adena tanga tesemi tang mezüngbuba odanger,” ta parnok anir senzüsang Army ketdangseri ashi.
“Onoki tir Ram Nath Kovind den ajurutepogo aser Qutub Minar semdangogo. Onok Delhi nung amongba mapang Red Fort semdangtsü aser Delhi Metro nung mener senzütsü. Iba sülen ano onok Rajasthan-i aotsü aser Assam-i mayipa aotsü,” ta paisa ashi.
Tesayurtem rongnungi kati ashiba agi, kaketshirtemi Assamese, Bengali aser Bodo oshi jembir aser parnok rongnung karibo English dena jembir.