Indian Army-i Indo-Myanmar arrtsü nung NSCN mita aoer

Itanagar/ New Delhi, September 04 (Agencies): Hombar nungi tenzüka Army indang special forces-i Arunachal Pradesh nung India-Myanmar arrtsülen Naga nunger telungpur telok mita odar, aser iba mapang nung telungpur ka tepset aser ka yirutsü, iba den külemi army-a ka injang agi yiruogo.
Tanep 7:00 ako nungi telungpur anema operation tenzük aser nikongdang tashi nuinga Longding district kübok Votnu yim anasa operation maneni odar, ta army ketdangser kati metetdaktsü.
Paisa, special forces telok kati NSCN telungpur jenoka aliba tesem ka makdokogo aser yangji AK prangpong ka den injang aser radio sets nguogo, ta ashi.
Mongolbarnü nungi tenzüka Ato kilonser, Narendra Modi-i anogo asemnü Myanmar semdangtsü, aser iba mapang nung telungpur teloktemi arrtsülen mapa inyakba densema onük aika jembitsü, ta osang angazüker.
New Delhi nung Army tongti, General Bipin Rawat-i Minister of State for Home, Kiren Rijiju ajurua senden menogo aser iba senden nung NSCN Khaplang telok indanga jembir südi ta bilemer.