Indian Army-i Myanmar atema mapa inyaktsü

Mandalay/Kolkata, March 15 (Agencies): Indian army-i Arakan Army (AA) anema mapa inyak ta osang angazüker. Myanmar kübok Rakhine province nung AA ya tashitait telungpur telok ka lir.
Mizoram kübok Chhimtuipui district nung AA tesep asem shi amak, ta Indian army osang ajanga ashir. Ajisüaka, iba mapang telungpurtem khasetba mesüra apuba indang osang kecha memetetdaktsür.
Taküm February ita tetenzüklen Myanmar kübok Sagaing province nung Myanmar army-i India kübok Northeast telungpurtem anema mapa inyakba melena India-ia iba mapa inyaktsü ta Indian army ketdangser kati ashi.
Indo-Myanmar arrtsü anasa Arakan Army indang teseptem makyonga aobaji February 17 nungi tenzükba March 2 nü tembang.
Myanmar kübok Chin state den arrtsüla aliba Chhimtuipui district (Mizoram) nung Indian sepaitemi inyakba mapaji parnoki meteta lir Myanmar army-ia ashi.
Tawa tu Arakan Army-i Chin state kübok Paletwa township nung khatepdang Myanmar sepai 11 tashi apu aser prangpong-injangtem rakzüka bener ao.
Parnokisa tan ita tetenzüklen amakdang Myanmar police 9 khaset aser ano pipe-bomb ka pokdaktsüdang Burmese military ketdangser ka kinungtsü pokset.
AA otongdar Khine Thukha-i osangbener dang ashiba agi, March 9 nü Paletwa kübok Pyan So yimtsüng anasa Burmese sepaitemji apu.
Sepaitemji Light Infantry Battalion 563 nungi lir aser parnok ya Gwa township nung amenoka lir, ta Khine Thukha-isa ashi.
Taoba hopta ishika tsüngda Arakan Army-i amakdang Burmese sepai aser police 20 dak tema khasetogo. AA telungpurtem ya India kübok Mizoram state aser Bangladesh kübok Chittagong Hill Tracts nung teseptem tenteta lir ta osang ajanga ashi.