Indian Army-i Pakistan sepai 4 khaset; Jawan ka den police ka asü

Srinagar, Rongchii (April) 24 (Agencies): Sangtennü (Mongulbar) Indian Army-i J&K kübok Krishna Ghati anasa Line of Control nung Pakistan nunger sepai pezü shi khaset.
Tentonü (Hombar) kasa tesem nung LoC adener Pakistan tsütsü nungi injang khaloktsüba atema India sepatemi meyiper khatepdang Pakistan sepai ka khaset. Iba tesem nung taoba anogo asemnü shi ka injang khalokja arur.
Ano, Pulwama district nunga Army jawan ka aser Jammu & Kashmir police ka tanü kiralongrartem den khatepdang asü.
Iba mapang Pakistan nunger telok Jaish-e-Mohammed züngsem 3 tashi sepaitemia khaset.
Telungpurtem aika jenoka lir ta osang tejangja ka angazükba sülen Tral kübok Laam forest nung sepaitemi telungpurtem anema mapa ka tenzük, ta police ketdangser kati ashi.
Iba mapang telungpurtem aser sepaitem tsüngda khatep aser idangji Army jawan aser police ka yiru. Tena Srinagar nung aliba mozü kitemi anir ao saka mekümzüktet, ta police ketdangserisa shisem.
Indian army jawan ji 42 Rashtriya Rifles (Assam Regiment) nungi Sepoy Ajay Kumar aser J&K police ji Latief Gojri ta jangjaogo.