Indian Army-i tiyazü nung tai tongloktsür: GPRN

Dimapur, Aenjeti 30 (TYO): Arunachal Pradesh kübok Changlang district nung Longpha yimer Kuhang Songthing ji NSCN (IM) nung private aser Raju Peyu ta Indian Army-i tiyazü nung tai tongloktsüba atema GPRN-i aitsür, ta MIP sangdong ka nung metetdaktsü.
Kuhang Songthing ji civilian ka dang lir aser GPRN army mesüra civil set-up nung pa Private mesüra Raju Peyu ama tenüng züluoka mali. Indian Army-i tesüba küm 70 tashi Naga linük nung tashiyim agi ketdangsüa aruaka, Naga Army nung ‘private’ aser civil set-up nung Raju Peyu tsüngda tebendang memetetba atema kanga sasa bilemtsür, ta MIP sangdong nungsa shia lir.
Iba amai tiyazü nung tai tongloktsübaji NSCN tenüng menüktsütsü atema inyakba ta ajiteter. Anungji Assam Rifles-i temulung melemi bilemba Naga nunger mashimashi apuba inyakyim anentsü metetdaktsür, ta parnokisa shisem.