Indian judicial nung temelenshi aika nüngdaker: Tir Pranab

New Delhi, February 23 (Agencies): Linük Tir, Pranab Mukherjee-i, küm aika tejaklen tenzükba Indian judicial inyakyim nung tongti temelenshi aika nüngdaker, ta ashi.
“Judicial Reforms – Recent Global Trends” indang mezüngbuba kaket Ato kilonser, Narendra Modi ket nungi agizükba sülen jembidang Tiri, infrastructure peria melira temelenshiji tamakoktsü, ta ashi.
“Küm aika tejaklen amenokba asen judicial inyakyim nung tongti temelenshi nüngdaker. Temelenshi ya mapang shia melenshia aliba maparen ka lir. Ibaji anentsü makok. Inyakyim ajak nung tetsükdaktsü adoker, ibayongji mapang shia temelenshi nüngdaker,” ta pai ashi.
Tiri ashiba agi, pa Tir inyakba mapang piyong linük nung court tulutiba, Allahabad High Court nung obendanger 180 lemzükja lir, ajisüaka obendanger shilem 50 dang lir.
“Temaba judiciary ka yamaji majung süra tekübok judiciary jenjang koma alitsü? State aser Union sorkari longjemer courtrooms agi anüngba aser obendangertem atema nüngdakba agi anüngba asoshi inyaktsüla,” ta pai ashi.
Kasa sentong nung Modi-ia, technology kera melenshiba den liromedema law university tem nung sempet alitsüla, ta ashi.
“Asen law university temi tang aliba onüktem ajak nung rangloker inyaktsüla,” ta Ato kilonseri ashi.
Modi-isa, Chief Justice of India), J.S. Khehar-i pa mapatong dak alia ano mapang tatsüka danga inyak nungbo ajungtsü, kechiyong pai kerakera telemtetba agir, ta ashi.
Ano Khehar-ia, temaba court-i panok ket nung aliba tashi kübok inyaktsü, ta ashi.
Parnok nem agutsüba tashi dak alia tashi mamshitsü, ta shia CJI, Khehar-i, “Khenkhenbo tetuyuba ka sendoktsü mesüra melenshitsü, mesüra yanglushitsüsa akumer, aser ibaji majung, ajisüaka onoki onok nem aguja aliba tashi sasep nung inyaktsü,” ta ashi.
Obendangertem shimoktsü dak sentakba nung Justice Khekhar-i, iba mapaji hopta ana tsüngda tembangtsü, ta ashi.