Indian Wells: Federer,Venus aser Daria semi-final tongtetogo

Indian Wells, Metsüremi 16 (Agencies): Indian Wells tennis asayamung Yangtepnü (Thursday) asayaba nung Switzerland nunger Roger Federer aser America tsür Venus Williams na straight set nung takok ngutetogo. Iba asayamung nung arishi küm 36 tain Federer-i trokbuba ‘title’ angutsüsa asayadar aser tetsürtem rongnungi arishi küm 37 tain Venus-i mezüngbuba takok angutsü meranga asaya arudar.
Iba asayamung tebur kija asaya nung Federer-i South Korea nunger Chung Hyeon madak 7-5, 6-1 agi takok nguogo aser 2006 küm nungi Federer-i asaya aruba nung tajungtiba takok 16-0 anguba den kasa kümogo.
Kasa asayamung tetsür kija asaya ka nung Venus-i Spain tsür Carla Suarez Navarro madak 6-3, 6-2 agi akok. 1997 Indian Wells asayamung qualifier asaya nung Venus-i mezüngbuba shilem agi aser iba mapang la arishi küm 16 liasü.
Aenjeti (January) nung Australian Open asayamung mapang Federer-i teburtem World No.1 jenjang tongtetta lir. Venus-i taoba Australian Open aser Wimbledon asayamung runners-up nung tembanga lai taoba küm ‘top 10’ jenjang tongtetta lir.
Iba asayamung semi-final nung Federer aser Crotia nunger Borna Coric na tsüngta asayatsü. Asaya ka nung Coric-i seed 7buba nung alisang, South Africa nunger Kevin Anderson madak 2-6, 6-4, 7-6 (3) agi takok angu. Coric-i Anderson den pezüben asaya nung tan takok anguba ya mezüngbuba alitsü.
Venus-i Indian Wells asayamung final khen danga tongtetta mali aser final asaya tongtettsü asoshi lai semi-final asaya nung arishi küm 20 tain Russia tsür, Daria Kasatkina madak takok angutsüla.
Yangtepnü (Thursday) iba asayamung tetsür kija asaya nung Venus-i minute 71 nung Saurez Navarro madak pezüben buba straight set nung takok nguogo.
Maneni iba asayamung tetsür quarter-final asaya ka nung Russia tsür Daria Kasatkina-i minute 58 nung taoba mapang World No.1 nung alila, Germany tsür Angelique Kerber madak 6-0, 6-2 agi akok.
Iba asayamung nung Kasatkina-i taoba U.S. Open nung champion, America tsür Sloane Stephens aser Denmark tsür Caroline Wozniacki na tsükdakja lir.
Stephens aser Australian Open nung takok angur Wozniacki na dak alaka, Kasatkina-isa taoba küm Grand Slam title aser French Open takok angula, Jelena Ostapenko aser Wimbledon champion, Garbine Muguruza na tsükdakja lir.
Iba asayamung tetsür semi-final nung World No.1, Romania tsür Simona Halep aser Japan tsür Naomi Osaka na tsungta asayatsü. Iba asayamung tetsür asaya aruba nung arishi küm 20 tain Osaka-i Maria Sharapova, World No. 31, Agnieszka Radwanska aser World No. 5 nung alila Karolina Pliskova nunger tsükdakja lir.