Indian Wells nung Serena aser Venus na asayatsü

California, Metsüremi 11 (Agencies): Küptoknü straight-sets nung Kiki Bertens madak takok anguba sülen, Serena Williams ya Indian Wells tasembuba round nung teyi Venus den asayatsü.
Venus aser Serena Williams na tennis asaya tenzüker tena tsüngta 28 ben asaya lir aser 2017 Australian Open final nung Serena-i 6-4, 6-4 agi Venus madak takok anguba sülen Serena asoshi tang mezüngbuba WTA Tour nung shilem agir.
Taoba küm Melbourne nung Serena-i la asoshi Grand Slam takok marok 23buba ngutetba mapang la ya mashisa liasü aser Rongjui (September) nung lar jala, Alexis Olympia ya aso.
Venus-ia World No. 35, Sorana Cirstea den minute 79 asayar 6-3, 6-4 agi akokba sülen tenu den asayatsü jenjang tongtet.
Serena aser Netherlands tsür, Bertens tsüngta ghonda ana majung asaya aser US tsürlai 7-6 (7/5), 7-5 agi akok.
Arishi küm 36 tain, Serena ya tetsür tennis asayar rongnungi mezüngbuba Indian Wells title asem abentsü meranger.
Iba asaya nung Serena-i la indang second-serve points shilem 54 ngutet aser Bertens indang serve trokben raksatsü.
Serena-i iba asaya nung ace ka dang ngutet aser unforced errors 37 liasü. Bertens-a iba asaya nung unforced errors 32 liasü.
Serena aser Venus tsüngta asayaba nung Serena-i 17 ben aser Venus-i 11 ben koka lir.
Tena tsüngta 1998 Australian Open tanabuba round nung mezüng asaya aser iba mapang Venus-i 7-6 (7/4), 6-1 agi koka lasü.
2001 küm Indian Wells semi-final nunga tena asayatsü liasü, saka Venus-i withdraw asüba ajanga Serena nem walkover agütsü.
Fans temi adianuna tsüngta asayaba reprangtsü jangra liasü, saka iba tasa ya tebu Richard-i yanglu ta temulung melemi aküm aser final nung Kim Clijsters madak Serena-i takok anguba mapang nüburtem mepela.
2001 Indian Wells asaya reprangertemi iba ama yimya amshiba ajanga tena iba asayamung nung küm 14 tashi masayai arur 2015 küm Serena William-i asaya. Ibai la asoshi Indian Wells nung küm 17 tsüngta asemben buba asayar lir.
Iba asayamung Küptoknü asaya nungsa Elina Svitolina-i Germany tsür, Mona Barthel madak 6-4, 6-3 agi akok.
Arishi küm 23 tain, Svitolina ya tasembuba round nung Spain tsür, Carla Suarez Navarro den asayatsü. Navarro-i Taiwan tsür, Hsieh Su-Wei madak 6-4, 2-6, 6-3 agi koka liasü.
Ukraine tsür Svitolina-i 2017 küm title pongu tashi kokteta liasü aser item ya Toronto, Rome, Istanbul, Dubai aser Taipei City nung asayabatem lir.