Indian Wells: Yuki, Vickery aser Kvitova nungeri kokogo

Metsüremi 10, 2018 (Agencies): BNP Paribas Open nung India nunger tennis asayar Yuki Bhambri tebur kija asaya mezüngbuba round nung France nunger asayar Nicolas Mahut straight sets nung kokogo.
Bhambri ya dang alima nung tennis asayartem rongnung jenjang 101 buba nung lir aser pai ghonda kaser minute 41 agia Mahut madak 7-5, 6-3 agi kokogo. ATP tour nung tena tang mezüngbuba ajuruteperba liasü.
Bhambri taruba asaya France nunger asayar Lucas Pouille den asayatsü shiba mezüngbuba round bye ngua liasü.
Kasa asayamung tetsür kija asaya tanabuba round nung America tsür qualifier Sachia Vickery-i third seed Garbine Muguruza 2-6 7-5 6-1 agi kokogo
Mezüngbuba set makokba sülen tanabuba set nunga 3-0 ta kümer makoktsüsa jenjang ka nung aliba mapang nung Vickery-i kanga junga asaya tenzük aser iba ajanga Indian Wells centre court nung sentepa aliba nüburtem jangratemdaktsüogo.
Iba asaya akokba ya Vickery atema tang tashi nung takok tulutiba asütsü.
“Ni küm aika kanga meranga asayaa aruogo aser aiben terara agi dang mekoki liasü,” ta arishi küm 22 tain Vickery-i ashi.
“Iba ya ni asoshi jangratemtsü aonung ka lir aser ni kanga pelar. Ni la akoktsü ta bilema maliasü. Ni point ajak atema kanga meranga asayaogo. Sentepa aliba nüburtema kanga jangratemtsüka asü aser parnoki ni kanga meranga pusemogo,” ta laisa ashi.
Kasa mapang nung tetsür kija asaya tanabuba round tanga ka nung Petra Kvitova-i 6-7(4) 7-6(3) 6-4 agi Kazakhstan tsür Dulia Putintseva madak takok nguogo.
Wimbledon anaben tashi koker alila Kvitova-i ghonda asemser minute 17buba nung Putintseva madak takok angu.
Asayamung tasembuba round nung Kvitova aser Vickery na asayatsü.
Maneni Johanna Konta (11), Ashleigh Barty (16), Svetlana Kuznetsova (19), Elise Mertens (22), Barbora Strycova (25) aser Agnieszka Radwanska (31) nunger ajak iba asayamung nungi tuguogo.