Indigenous Non-Naga nungertemi PIL agiendaktsütsüla: CNTC

Dimapur, June 28 (TYO): BJP lennir Ashwini Kumar Upadhyay-i Supreme Court nung ILP anema PIL benokba aitsür ta Central Nagaland Tribes Council (CNTC)-i metetdaktsü.
Dimapur nung aliba Indigenous non-Naga telok ajaki iba PIL meyipa agiang ta takhangba agütsütsüla, ta CNTC-isa ashi.
Naga nungertemi ozüng alema aruba khuret ajitetba atema temolung anisüngzüker. Asenoki mapang talangka iba onük zübazüba toktsüogo. Hao, telok balalai ILP tebilemtsü atema kanga meranga inyaka aruogo saka mapa tom nung toktsü, ta CNTC-i metetdaktsü.
Ajisüaka, JCPI-i mapang tatsüka tsüngda kin hoho tem teyari agia state sorkar dang Nagaland ajungalen ILP benoktsü atema telemtetba agidaktsüogo. Tanü, bendanger kati ILP anema PIL benoker saka asenoki iba tebilemtsü atema teinyaktsütem meinyaki toktsür, asüng tetsükdaktsü aser timtem tuluba ajurutsü, ta parnokisa ashi.
State sorkari memenui ILP dak sendakba maparen inyaktsüla kechiyong iba ya asen chirnurtem indang tarutsü atema lir. Naga nungertemi tarutsü putu atema bilemtsüra, mapang meindoki süoki ia iba mapa inyaktsüla. Maneni, kin hohotemia osangkakettem nung dang züluba masü saka mapa agia inyaktsü mepishir, ta CNTC-isa metetdaktsü.