IndiGo-i North-East nisung tasümang angati bentsütsü

New Delhi, January 12 (Agencies): IndiGo aser Delhi Police sentepa ‘Akhiri Ahuti’ sentong ka tanü tenzükogo, aser nüburtem atema iba mapa tajung inyakba sentong kübok Northeast nisung Delhi nung asürtem tasümang IndiGo tayimtsü-i angati bener arutsütsü.
Ajisaka iba maparen ya Delhi Police nungi temelaba agütsü nung ang inyaktsü, ta IndiGo ajanga sangdongogo.
Iba sentong ya Northeast nungi tajemzük tia nung alirtem tasümang belenshitsü asoshi teyari agütsür, ta IndiGo-i ashi.
“Tesüiba mapangtem nung North-east states nung aliba nisungtem Delhi/NCR nung asüba yangji sang kinungertem medeni arem. Senotsü peria maliba ajanga asür kinungertemi tasümang par tasoli tonga bener moutet,” ta IndiGo ajanga sangdong ka nung metetdaktsü.
“North East nungi tajemzük tia nung alirtem tatembangbuba maparen nung Delhi Police den külemi yaritepa par tasoli tongtsütsü asoshi sentong yanglutetba ya konang ka ama ni bilemer,” ta IndiGo President, Aditya Ghosh-i metetdakja liasü.
IndiGo tayimtsü ya Delhi nungi North East nung aliba airport pongu-i aoer aser itemji Agartala, Singerbhil, Dibrugarh Chabwa, Dimapur, Guwahati aser Imphal Municipal airport tem lir.
“Delhi nungi Northeast-i tayimtsü nung tasümang bener aotsü ya jenjang kanga tasak. Aser iba sentong ajanga Northeast nübur tajemzük tia nung alirtem asoshi anisüngzük tulu bener arutsür,” ta Delhi Police nung Joint Commissioner, Robin Hibu-ia metetdakja liasü.